Монголд өвлийн дизель түлшний импортын үнэ 20 орчим хувиар өссөнтэй холбоотойгоор жижиглэнгийн үнэ литр тутамд 800-900 төгрөгөөр нэмэгдэх нөхцөл үүссэн билээ. Харин дэлхийн зах зээлд дизелийн нийлүүлэлт хязгаарлагдмал хэвээр байгаа бөгөөд ОХУ АНУ-д түлш нийлүүлэхээр болсон ч энэ нь олон улсын үнийг бууруулахад хэрхэн нөлөөлөх нь одоогоор тодорхойгүй байна.

Монополын эсрэг газрын аравдугаар сарын 22-ны мэдээллээр ОХУ-аас импортолж буй дизель түлшний үнэ тонн тутамд 1253 ам.доллар байснаас 1551 ам.доллар болж өссөн байна. Энэ нь ойролцоогоор 24 хувийн өсөлт юм. Тус газраас дотоодын тээвэрлэлт, шилжүүлэн ачилт, түгээлт, борлуулалтын зардал нэмэгдээгүйг онцолж, үндэслэлгүй үнийн өсөлтөөс сэргийлэх хяналт тавьж байгааг мэдээлжээ.

Мөн аравдугаар сарын 22-ны байдлаар Монгол Улс АИ-92 автобензиний 10, АИ-95 бензиний 13, дизель түлшний 28, онгоцны түлшний 36 хоногийн хэрэглээтэй тэнцэх нөөцтэй байна. Шатахууны импорт тасралтгүй үргэлжилж, түгээлтийг 24 цагийн турш зохион байгуулж байгааг холбогдох байгууллагаас мэдээлсэн юм.

Дизель түлшний үнийн өөрчлөлт нь зөвхөн автомашин эзэмшигчдэд хамаарахгүй. Хөдөө аж ахуй, уул уурхай, ачаа тээвэр болон бараа бүтээгдэхүүний түгээлтэд дизель түлш өргөн ашигладаг учраас зардлын өсөлт цаашлаад тээврийн тариф, бараа бүтээгдэхүүний үнэд нөлөөлөх эрсдэлтэй.