УИХ-ын Төсвийн зарлагын хяналтын дэд хорооны өнөөдрийн хуралдаанаар Монгол Улсын 2027 оны төсвийн тухай, Үндэсний баялгийн сангийн 2027 оны төсвийн тухай, Нийгмийн даатгалын сангийн 2027 оны төсвийн тухай, Эрүүл мэндийн даатгалын сангийн 2027 оны төсвийн тухай хуулийн төслүүдийн гурав дахь хэлэлцүүлгийг хийлээ.

Энэ үеэр Монголбанкны 7 их наядын алдагдлыг 2030 он хүртэл ямар эх үүсвэрээс бууруулах талаар УИХ-ын гишүүн Д.Цогтбаатар тодруулахад Монголбанк 2023 он хүртэл жил бүхэн 1.5 их наядын Засгийн газрын тусгай бонд гаргаж алдагдлаа нөхөх тогтоолын төсөл УИХ-д оруулсан байсан. Харин үүнийг Сангийн сайд З.Мэндсайхан эсэргүүцэж байгаагаа хэлээд тогтоолын төслөө буцаан тат гэсэн юм.

Монголбанкны Тэргүүн дэд ерөнхийлөгч Э.Анар: 2027 оны Монголбанкны Үндсэн чиглэлд 2026-2030 он хүртэл баталсан Стратеги төлөвлөгөөнд жил бүр нэг их наяд төгрөгийн бонд гаргаж бууруулахаар тусгасан. Засгийн газрын тусгай бонд гэсэн санал оруулсан.

Сангийн сайд З.Мэндсайхан: Энэ Монголбанкны ерөнхийлөгч Монгол Улсын Ерөнхийлөгч болчихсон юм шиг байна билээ. Тэр ерөнхийлөгчдөө очиж хэлээрэй. Монголбанк 7.5 их наядын алдагдлаа жил бүр 1.5 их наядын бонд гаргуулаад хаана гэж байгаа. Үүнийг Мөнгөний бодлого дээрээ тогтоолын төсөл болгоод оруулаад ирчихсэн. Засгийн газар бонд гаргаад Монголбанкны алдагдлыг хаана. Дөрвөн жилийн дотор энэ алдагдлыг хаагаад дуусахад Монгол Улсын төсөв 7.5 их наядын алдагдалтай болно гэсэн үг. Хийсэн үйл ажиллагааны алдааг авчраад Засгийн газарт үүрүүлэх төсөл оруулж ирсэн. Та нар энэ төслөө татаж аваарай.