Монгол Улсын Засгийн газар Рио Тинто групптэй хийсэн хэлэлцээрийн үр дүнд 2027 онд Оюу толгой төслөөс хувьцаа эзэмшигчдэд ногдол ашиг хуваарилах тохиролцоонд хүрснээ 2026 оны есдүгээр сарын 11-ний өдөр зарласан.

Үүний дараа Монгол Улсын Засгийн газар 2027 оны төсвийн төсөлд Оюу толгой ордоос 3 их наяд төгрөгийн ногдол ашиг авахаар тусгаж оруулж ирэв. Үүнийхээ 2 их наяд төгрөгийг нийгэм, эдийн засгийн төсөл хөтөлбөрт зарцуулж, 1 их наяд төгрөгийг иргэдийн хуримтлалын дансанд төвлөрүүлэхээр тусгажээ. Энэ бол Оюу толгойн 34 хувийг эзэмшиж буй Монголын Засгийн газрын байр суурь. Харин 66 хувийг эзэмшиж буй Рио Тинто группээс өнөөдрийг хүртэл Оюу толгойгоос хэдий хэмжээний ногдол ашиг авахаа зарлаагүй байна. Үүнтэй зэрэгцэн Оюу толгой ордоос жил бүр ногдол ашиг хуваарилах уу, эсвэл 2027 онд нэг удаа ногдол ашиг хуваарилах уу гэдэг асуулт гарч буй.

Талууд энэ асуултад ямар байр суурь илэрхийлснийг хүргэе.

Ерөнхий сайд Н.Учрал: Монгол Улсын Засгийн газар 17 жилийн дуусдаггүй яриаг дуусгаж, Оюу толгойн ногдол ашгаа Монголдоо авчрахаар болсон. Ирэх онд монголчууд Оюу толгой ордоос 3 их наяд төгрөгийн ногдол ашиг авна. Оюу толгойн ногдол ашгаа нэг удаа биш жил бүхэн авна. Харин Монгол Улс мөнгөгүйн болон мөнгөтэйн зовлонд унасаар байж болохгүй. Олсныхоо хэрээр үрдэг урд өмнөх алдаагаа засаж, өр биш өв үлдээж ухаалаг зөв ашиглах учиртай. Оюу толгой бол таны хувь, таны баялаг юм. Тиймээс иргэдийн санал Монгол Улсын Засгийн газрын эцсийн дээд шийдвэр байна.