NBA-ийн 2026–2027 оны улирал аравдугаар сарын 20-нд эхэлж байна. Улирлын нээлтийн өдөр Бостон Селтиксийн эсрэг Детройт Пистонс, Филадельфи Сиксерсийн эсрэг Нью-Йорк Никс, Оклахома Сити Тандерын эсрэг Сан-Антонио Спөрс баг тус тус тоглоно. Тоглолтууд Монголын цагаар аравдугаар сарын 21-ний 03:00, 07:00, 09:30 цагт болох хуваарьтай байна.

Энэ улиралд ямар баг аварга болох вэ гэдгээс гадна Йокич трипл-даблын тоогоо нэмэгдүүлэх эсэх, Карри гурван онооны шидэлтийн рекордоо ахиулах эсэх, Дюрант онооны жагсаалтад хэдэн байр урагшлах, Жеймс дахин ямар түүхэн амжилт үзүүлэх нь эсэх нь сонирхолтой.

Никола Йокич 200 дахь трипл-даблд ойртжээ

“Денвер Наггетс” багийн төвийн тоглогч Никола Йокич 2026–2027 оны улиралд карьерынхаа 200 дахь трипл-даблд хүрэх боломжтой байна. Йокич карьерынхаа трипл-даблын тоог 200-д хүргэвэл NBA-ийн түүхэн дэх энэ амжилтын босгыг давсан цөөн тоглогчийн нэг болно.

Трипл-дабл гэдэг нь нэг тоглолтод гурван өөр статистик үзүүлэлтээр тус бүр 10 буюу түүнээс дээш амжилт гаргахыг хэлдэг. Йокичийн онцлог нь зөвхөн оноо авах чадвараар хязгаарлагдахгүй. Тэрбээр багийн довтолгоог зохион байгуулж, хамтрагчдаа оновчтой дамжуулалт өгөх, самбараас бөмбөг авах зэргээр тоглолтын олон талбарт үр нөлөө үзүүлдэг.