Япон улсын Айчи мужийн Нагоя хотноо үргэлжилж буй “Айчи–Нагоя 2026” Азийн тав дахь удаагийн пара наадмаас Монголын тамирчид медалийн төлөөх өрсөлдөөнөө үргэлжлүүлж байна. Өнөөдөр байт харваа, пара таеквондо, пара жүдо бөхийн төрлөөр Монголын тамирчид алтан болон хүрэл медалийн төлөө өрсөлдөх юм.

Байт харвааны рекурв төрөлд ОУХМ Д.Сэлэнгээ алтан медалийн төлөө шалгарлаа. Тэрээр шөвгийн 16-д Ираны тамирчныг 6:5, шөвгийн наймд Энэтхэгийн тамирчныг 6:2, хагас шигшээд Индонезийн тамирчныг 6:2-оор тус тус ялж, финалд өрсөлдөх эрхээ авсан. Тэрээр аравдугаар сарын 24-нд БНХАУ-ын тамирчин Гао Зихантай алтан медалийн төлөө цэц мэргэнээ сорих юм.

Д.Сэлэнгээ 2025 оны дэлхийн аварга шалгаруулах тэмцээнд эмэгтэйчүүдийн багийн болон холимог багийн төрөлд түрүүлж, дэлхийн хошой аварга болсон билээ.

Пара таеквондогийн K44 ангиллын эрэгтэйчүүдийн -63 кг-ын жинд МУГТ Г.Болор-Эрдэнэ мөн алтан медалийн төлөө өрсөлдөнө. Тэрээр хагас шигшээд Ираны хүчтэй өрсөлдөгчөө 2:0-ээр буулган авч, финалд шалгарсан бөгөөд Узбекистаны тамирчинтай тулалдана.