Шууд хариулвал, Оюу толгойн ногдол ашиг орж ирэхгүй бол 2027 оны төсөвт 2 их наяд төгрөгийн цоорхой үүснэ. Өргөн барьсан 2027 оны төсвийн төсөлд алдагдлаа хуульд заасан дээд хэмжээндээ тулгаж оруулж ирсэн бөгөөд хэрвээ Оюу толгойгоос ногдол ашиг орж ирэхгүй бол энэ цоорхойг нөхөх эх үүсвэр алга.

Засгийн газар 2027 онд Оюу толгойн 34 хувьд ногдох ногдол ашгийг 3 их наядаар тооцож буй. Үүнээс 2 их наядыг улсын төсвийн хөрөнгө оруулалт хэлбэрээр ашиглах бөгөөд эрчим хүч, боловсрол, боомтын хөрөнгө оруулалтад зарцуулна. Үлдсэн 1 их наядыг Хуримтлалын санд хийнэ.

Харин ногдол ашиг огт орж ирэхгүй бол нэгдсэн төсвийн алдагдал ДНБ-ий хоёр хувиас 3.7 хувь хүртэл өснө. Хуримтлалын санд орох 1 их наяд тасарвал жилийн төсөвт шууд нөлөөлөхгүй. Гэхдээ баялгийн өгөөжийг ирээдүй үед хуримтлуулах амлалт хэрэгжихгүй л гэсэн үг.

Оюу толгойн ногдол ашгаас гадна төрийн өмчит компаниудаас 3.5 их наяд төгрөгийн орлого бүрдүүлэхээр тусгасан бөгөөд хэрэв энэ орлого орж ирэхгүй бол улсын төсвийн алдагдал  7.8 их наяд буюу ДНБ-ий 6.8 хувьд хүрэх эрсдэлтэй. Ийм бодитой эрсдэлтэй төслийг дээрх зурагт эрхмүүд өргөн бариад байгаа юм.