БНХАУ-ын экспорт 2026 оны есдүгээр сард өмнөх оны мөн үеэс 36.3 хувиар өсөж, хоёрдугаар сараас хойших хамгийн өндөр өсөлтөө үзүүлжээ. Үүний зэрэгцээ импорт 31 хувиар нэмэгдсэн ч тус улсын сарын гадаад худалдааны ашиг 133.53 тэрбум ам.долларт хүрч, шинжээчдийн таамгийг давсан байна.

БНХАУ-ын Гаалийн ерөнхий газрын мэдээллээр есдүгээр сард экспортын үнийн дүн 447.18 тэрбум ам.долларт хүрсэн бол импорт 313.65 тэрбум ам.доллар болжээ. Ингэснээр эхний есөн сарын гадаад худалдааны ашиг 938.1 тэрбум ам.долларт хүрсэн нь өмнөх оны мөн үеэс бараг найман хувиар өссөн үзүүлэлт юм. Тус улсын 2025 оны жилийн худалдааны ашиг 1.2 их наяд ам.долларт хүрч, түүхэн дээд хэмжээнд хүрсэн бөгөөд энэ онд уг үзүүлэлтийг давах төлөвтэй байна.

Өндөр технологийн бүтээгдэхүүний экспорт өсөлтийг голлон бүрдүүлжээ

Экспортын өсөлтөд хиймэл оюуны дэд бүтэц, хагас дамжуулагч болон компьютерийн тоног төхөөрөмжийн дэлхийн эрэлт нэмэгдсэн нь голлон нөлөөлсөн байна. БНХАУ-ын өндөр технологийн бүтээгдэхүүний экспорт есдүгээр сард бараг 64 хувиар өссөн бөгөөд нийт экспортын өсөлтийн тал орчим хувийг өндөр технологийн бүтээгдэхүүн бүрдүүлжээ.

Тухайлбал, хагас дамжуулагчийн экспортын үнийн дүн өмнөх оны мөн үеэс 108.1 хувиар өссөн бол автомашины экспортын хэмжээ мөн 50 гаруй хувиар нэмэгдсэн байна.