УИХ-ын гишүүн У.Отгонбаяр Мобиком корпорацийн удирдлагуудтай Дорнод аймгийн Халхгол сумын нутаг, Нөмрөгийн дархан цаазат газарт нэвтэрч, санамсар болгоомжгүйгээс үүдэн түймэр тавьсан гэх мэдээлэл олон нийтийн хэрэгслээр гарч, ихээхэн шүүмжлэл дагуулж буй. Тэгвэл УИХ-ын гишүүн У.Отгонбаяр энэхүү асуудлаар тайлбар хийж, түймэр гарсан өдөр Улаанбаатар хотод УИХ-ын чуулганд сууж байсан гэдгээ мэдэгдлээ.

Тэрээр, Нөмрөгийн дархан цаазат газарт гал гарч байгальд ихээхэн хэмжээний хохирол учирсанд харамсаж байна. Сүүлийн өдрүүдэд олон нийтийн мэдээллийн хэрэгслээр надтай холбоотой буруу ташаа мэдээлэл нэлээд явж байна. Би Хэнтий, Дорнод, Сүхбаатар аймагт тойрогтоо ажилласан нь үнэн. Гэхдээ гал гарсан өдөр буюу 10 сарын 8-ны 11:55 минутад хотод байсан. УИХ-ын чуулганд 13:40 минутад ирцээ бүртгүүлсэн баримтаас үүнийг харж болно. Би Дорнод аймгаас сонгогдсон ч Нөмрөгийн Дархан цаазат газарт амьдралдаа очиж үзээгүй. Аравдугаар сарын 6-нд Сүмбэрийн боомт дээр шилэн кабелийн нээлтэд очсон. Энэхүү үйл ажиллагаанд Мобиком, Хил хамгаалах ерөнхий газар, аймгийн ЗДТГ бүгд байсан. Би үүнд оролцчихоод аймгийн төв рүү явсан. Харин тэр хүмүүс үлдэж цаашаа Нөмрөг явах замдаа гал тавьсан гэж ойлгосон. Гал тавьсан хүмүүс надтай хамааралгүй. Ямар жаахан хүүхдүүд биш. Бие биенийгээ дагаж явах шаардлагагүй.  УИХ-ын гишүүний хувьд тойрогтоо болж байгаа арга хэмжээнд оролцох нь ажлын үүрэг. Хууль хяналтын байгууллага ямар журмаар яаж оров, яагаад гал тавьсан юм зэрэг зүйлийг тодорхойлж нөхөн төлбөр, тэнд гарсан  хор хохиролын учрыг олох байх гэж бодож байна гэв.