УОК-иос гаргасан шийдвэрийн талаар Шадар сайд Н.Номтойбаяр мэдээлэл хийлээ.

Тэрээр "ОХУ-аас албан ёсны хариу ирсэн. Шинжилгээний дүнгээр COVID-19-ийн хоёр, риновирусийн хоёр тохиолдол илэрсэн бөгөөд бусад халдварт өвчний үүсгэгч илрээгүй байна. Аравдугаар сарын 7-ны өдрийн байдлаар нийт хавьтагчдын эмнэлгийн хяналт 100 хувь дууссан. Халдварт өвчинтэй холбоотойгоор эрүүл мэндийн байдал нь өөрчлөгдсөн тохиолдол гараагүй бөгөөд лабораторийн 5000 орчим шинжилгээний дүнд аюултай эмгэг төрүүлэгч бичил биетэн илрээгүй. Мөн нас барсан ажилтан шаардлагатай вакцинд хамрагдаж, дархлаа нь тогтсон байсан. Мэргэжлийн хоёр байгууллагын дүгнэлтээр эмгэг төрүүлэгч бичил биетэнтэй харьцах явцад осол, зөрчил гараагүй нь батлагдсан байна.

Хэдийгээр ийм хариу ирсэн ч биокамбинат, хүнсний аюулгүй байдлыг хангах чиглэлээр лабораториуд болон гааль, хяналтын байгууллагуудын бүтэц, зохион байгуулалт, хүний нөөцийн чадавх, шаардлагатай тоног төхөөрөмжийг сайжруулах чиглэлээр авч хэрэгжүүлэх арга хэмжээ үргэлжилнэ. Бид болзошгүй эрсдэл, аюулт нөхцөл байдалд хангалттай бэлэн биш гэж Улсын онцгой комисс үзсэн. Өндөржүүлсэн бэлэн байдлын зэргийг цуцаллаа гээд бүх зүйлээ орхиж, тайван сууна гэсэн үг биш.

Хоёрдугаарт, өвөлжилтийн бэлтгэл ажлын хүрээнд нэн яаралтай авч хэрэгжүүлэх 205 арга хэмжээний хэрэгжилтийн явцын талаар холбогдох яамдаас мэдээлэл авсан. Одоогоор хэд хэдэн аймгийн дулаан, эрчим хүчний асуудлыг шийдвэрлэж байна.