ОХУ-ын Эрхүү мужид онц аюултай халдварт өвчнийг судалдаг хүрээлэнд ажиллаж байсан 28 настай эмнэлгийн ажилтан тодорхойгүй шалтгаант уушгины хатгааны улмаас нас барсан нь олон улсын анхаарлын төвд байна. Талийгаачийн өвчлөлийг уушгины тахал байж болзошгүй гэх сэжиг гарсан ч одоогоор уг халдвар албан ёсоор батлагдаагүй, Оросын талаас тодорхой мэдээлэл өгөөгүй байна.

Уушгины тахал нь хүнд хэлбэрийн тахал бөгөөд амьсгалын замын дуслаар хүнээс хүнд амархан дамждаг байна. Өвчнийг эрт оношилж, антибиотик эмчилгээг цаг алдалгүй эхлүүлэхгүй бол ноцтой хэлбэрт шилжих эрсдэлтэй аж.

Үүнтэй холбоотойгоор талийгаачтай хавьтал болсон 197 хүнийг тогтоож, 189 хүнийг эмнэлгийн ажиглалтад оруулжээ. Мөн хүрээлэнгийн 60 гаруй ажилтныг тусгаарлаж, Эрхүүгийн зарим эмнэлэгт урьдчилан сэргийлэх арга хэмжээ авсан байна.

ОХУ-ын Роспотребнадзор талийгаачийн оношийг шалтгаан тогтоогдоогүй хатгаа гэж мэдээлсэн. Тус байгууллагын мэдээлснээр, шинжилгээгээр хүрээлэнгийн үйл ажиллагаатай холбоотой аюултай бичил биетэн илрээгүй бөгөөд лабораторид био аюулгүй ажиллагааны осол гарсан гэх нотолгоо байхгүй байна. Мөн хавьтал болсон хүмүүсийн дунд уушгины тахлын халдвар илрээгүй бөгөөд COVID-19-ийн хоёр, риновирусийн хоёр тохиолдол бүртгэгдсэн байна.