"Дэлхийн Монгол" булангийнхаа ээлжит зочноор Б.Энэрэлийг урьж ярилцлаа. Түүний хувьд эх орондоо багш мэргэжил эзэмшин ажиллаж байгаад Европ, Унгар улсад мэргэжил дээшлүүлэн суралцаж, тэндээ олон улсын сурагчдад багшилж туршлага хуримтлуулаад иржээ. Тодруулбал, 2019–2021 онд Унгар улсын Этвөш Лорандын их сургуульд боловсрол, судлал, менежмент чиглэлээр магистрын зэрэг хамгаалсан. Сүүлийн тав гаруй жил төсөлд суурилсан болон байгальд түшиглэсэн сургалтын арга зүйгээр Монголын орон нутагт ажиллаж буй багш нар, мөн олон улсын сургуулийн багш нарыг сургаж, зөвлөн дэмжиж байна. Тэрээр боловсролын салбарт ажиллахын зэрэгцээ Унгарт амьдарч буй монгол хүүхдүүдэд эх хэл, өв соёлоо суралцах боломж олгох "Гүем" бямба гарагийн сургуулийг үүсгэн байгуулсан юм. Б.Энэрэл одоо Унгарт хуримтлуулсан мэдлэг, туршлагаа Монголын боловсролын салбарт нутагшуулах зорилгоор TeachLead Institute-ийг үүсгэн байгуулж, багшийн мэргэжлийн хөгжил, шинэлэг сургалтын арга зүй, сургуулийн хөгжлийн чиглэлээр ажиллаж байна.

Ингээд түүнтэй ярилцсанаа хүргэе.

-Ярилцлагаа таны бага наснаас эхэлье. Та багадаа ямар хүүхэд байсан бэ?

-Би Баян-Өлгий аймагт төрж өссөн. Аймгийн төвдөө арван жилээ төгсөж, суралцсан. Зуныхаа амралтаар хөдөө хөгшин ээж дээрээ очиж тусалдаг хүүхэд байлаа. Тэнд надтай нийлээд манай үеэлүүд нийт 15 хүүхэд жижигхэн бор гэрт зуны гурван сарыг хамтдаа өнгөрөөдөг байсан. Эндээс л одоогийн Б.Энэрэлийн бүх суурь тавигдсан. Нэг гэрт өөр, өөр айлын 15 хүүхэд зохицон амьдарч, эмээгийнхээ удирдлагаар хэдэн ямаагаа сааж, сүү цагаан эдээгээ боловсруулна. Намар нь  наранд борлож шарласан бор хүүхдүүд аймгийн төв рүү хичээлдээ суухаар явдаг байв. Би хоёр эрэгтэй хүүхдийн дундах охин. Багадаа маш сэргэлэн, үеэлүүд дотроо шинийг санаачилдаг жаахан дэггүй талдаа хүүхэд байсан.