Дэлхийн банк Зүүн Ази, Номхон далайн бүсийн эдийн засгийн 2026 оны өсөлтийн төсөөллөө өмнөх таамгаас 0.3 нэгж хувиар нэмэгдүүлж, 4.5 хувь болгон шинэчилжээ. Гэхдээ бүс нутгийн өсөлт хиймэл оюун ухаантай холбоотой үйлдвэрлэл, экспортод ихээхэн түшиглэж байгаа нь эрсдэл дагуулж байгааг анхааруулсан байна.

Дэлхийн банкны тайланд дурдсанаар, бүс нутгийн эдийн засаг 2027 онд 4.4 хувь, 2028 онд 4.3 хувиар өсөх төлөвтэй байна. Тус бүсийн орнуудаас Вьетнамын өсөлтийн төсөөлөл хамгийн их нэмэгдэж, 7.4 хувь болжээ.

Хиймэл оюун ухааны технологид шаардлагатай бараа бүтээгдэхүүний эрэлт бүс нутгийн экспортын өсөлтийн гол хөдөлгөгч болж байна. Малайз, Филиппин, Тайланд болон Вьетнамын экспортын өсөлтийн 70 гаруй хувийг AI-тай холбоотой бүтээгдэхүүн бүрдүүлж байгаа аж.

Хятад, Индонез, Малайз, Филиппин, Тайланд, Вьетнам зэрэг зургаан улс 2025 оны тавдугаар сараас 2026 оны дөрөвдүгээр сар хүртэлх хугацаанд нийт 1.4 их наяд ам.долларын AI-тай холбоотой бараа бүтээгдэхүүн экспортолсон байна.

Дэлхийн банк AI-ийн эрэлт болон хөрөнгө оруулалт саарвал энэ нь бүс нутгийн эдийн засгийн өсөлтөд хүчтэй сөргөөр нөлөөлж болзошгүй гэж үзжээ.