“Монсудар” хэвлэлийн газраас нэгдүгээр ангийн сурах бичиг боловсруулах, хэвлэхтэй холбоотой тендерт эрх бүхий албан тушаалтнуудтай холбоотой компаниуд шалгарч байгаа талаар өнөөдөр мэдээлэл хийлээ.

Тус хэвлэлийн газрын хуульчийн мэдээлснээр, "Уг тендерийг Боловсролын ерөнхий газар зохион байгуулсан бөгөөд тендерийн явц удааширсан нь захиалагч байгууллагын Үнэлгээний хорооны мэдлэг, ур чадвар, мэргэшсэн байдалтай холбоотой байж болзошгүй гэж үзэж байгаа. Энэ асуудлаар Авлигатай тэмцэх газарт гомдол гаргаж, шалгуулж байгаа юм. Ашиг сонирхлын зөрчил үүссэн байж болзошгүй гэж үзэж байгаа гол шалтгаан бол “Соёмбо принт” компанийн хувьд УИХ-ын гишүүн Д.Амарбаясгалан 2000-2007 онд тус компанийн Ерөнхий менежер, захирлаар ажиллаж байсан. Харин “Мөнхийн үсэг” компанийн хувьд Гадаад харилцааны сайд, УИХ-ын гишүүн Б.Батцэцэг 1996-2005 онд тус компанийн Ерөнхий захирлаар ажиллаж байсан. Эдгээр компани шалгарч байгаа нь манай компанийн хувьд гомдолтой асуудал. Төр засаг хүүхдүүдийг бодсонгүй, зөвхөн ашиг хонжоо харлаа гэж үзэж байна” гэв.

Түүнчлэн 2024-2025 онд татвар төлөгчдийн 6.7 тэрбум төгрөгөөр боловсруулсан туршилтын сурах бичгийн агуулгыг тендерт оролцож буй компаниуд хэрхэн олж авсан нь эргэлзээтэй байгааг мэдээлсэн юм. Өмнө нь боловсруулсан сурах бичгийн агуулга, материалыг оролцогч компаниуд өөрсдийн боловсруулсан бүтээл мэтээр ашиглаж байгаа эсэх асуудал хөндөгдөж байгаа бөгөөд үүнтэй холбоотойгоор оюуны өмчийн асуудал ч яригдаж байгааг онцлов.