Улаанбуудайн урамшууллаас нэг өмчлөгчтэй 13 аж ахуйн нэгж 18 тэрбум төгрөг авсан асуудлыг сонсголын үеэр ил болголоо. Тодруулбал, УИХ-ын Хянан шалгах түр хорооноос Хүнс, хөдөө аж ахуй, хөнгөн үйлдвэрийн салбарт 2008 оноос хойш төрөөс олгож буй дэмжлэг, урамшуулал, зээлийн хүүгийн татаасын олголтыг хэлэлцсэн ерөнхий хяналтын сонсголын үеэр хэд хэдэн баримт дэлгэсэн нь олон нийтийн анхаарлыг татсан. Тухайлбал, 18 тэрбум төгрөгийн хөнгөлөлттэй зээл авсан 13 компани “Гацуурт” ХХК-ийн Л.Чинбаттай холбоотой гэх мэдээлэл олон нийтэд гарч, компанийн нэрсийн жагсаалт нийтлэгдсэн юм.

Манай редакц 13 компанийн эзэмшлийн бүртгэлийг Opendatalab.mn, Shilen.gov.mn зэрэг нээлттэй мэдээллийн сангаас шалгахад 12 компани нь Л.Чинбат болон түүний эхнэр, хүүхэдтэй хамааралтай хүмүүсийн нэр дээр бүртгэлтэй байна. Мөн зарим компанийн эзэмшигч 2019 оны намар солигдож, 8-10 сарын дараа дахин Л.Чинбатын нэр дээр буцаж шилжсэн нь анхаарал татаж байна.

Сонсголоор юу илэрсэн бэ

Есдүгээр сарын 28-нд болсон Хүнс, хөдөө аж ахуй, хөнгөн үйлдвэрийн салбарт 2008 оноос хойш төрөөс олгож буй дэмжлэг, урамшуулал, зээлийн хүүгийн татаасын олголтыг хэлэлцсэн ерөнхий хяналтын сонсголын үеэр шинжээчид 2008-2025 онд нийт 279.9 тэрбум төгрөгийн улаанбуудайн урамшууллыг 11,829 иргэн, аж ахуйн нэгжид олгосон талаар мэдээлсэн. Үүний 35.8 хувь буюу 100 тэрбум төгрөгийг тариаланчдын 1.2 хувь болох 54 аж ахуйн нэгж авсан байна. Мөн нэг өмчлөгчтэй 13 аж ахуйн нэгж нийт 18 тэрбум төгрөгийн урамшуулал авсныг онцолсон юм.