Аж үйлдвэр, эрдэс баялгийн сайд Г.Дамдинням шатахууны татан авалт, хариу арга хэмжээний талаар мэдээлэл хийлээ. Энэ долоо хоногоос нийслэл болон орон нутагт шатахууны нийлүүлэлт саатаж, оочир дараалал ихсээд байгаа юм. Г.Дамдинням сайдын хувьд Ерөнхий сайд Н.Учралын Япон улсад хийх айчлалын багт ажиллаж, Японы талд газрын тосны бүтээгдэхүүн хадгалах агуулахын цогцолбор байгуулахад хамтрах саналыг тавьж, нааштайгаар шийдвэрлүүлэхээр болсон байна. Ингэсээр Монгол Улс нэг сарын хэрэглээгээ нөөцлөх түлш, шатахууны савтай болно гэж тооцож байгаа аж.

Аж үйлдвэр, эрдэс баялгийн сайд Г.Дамдинням: Манай улс жилдээ 380 мянган тонн газрын тос олборлож байна. Үүний 30 хувь бензин болох боломжтой. Энэ нийт ачаалалтай үеийн нэгхэн сарын хэрэглээ юм. Тиймээс бид олборлож байгаа хэмжээгээ цаашид 1.5 саяд хүргэж байжнийт бензиний хэрэглээнийхээ 50 хувийн дотоодоосоо хангах боломжтой болох юм. Тиймээс яам газрын тосны хайгуул судалгааг эрчимжүүлэхэд нэлээд анхаарч ажиллаж байна.

Онгоцны түлш хүндэрсэн байсныг нааштайгаар шийдэж гайгүй нөөцтэй болсон. Дизель түлш бол уул уурхай, хөдөөө аж ахуйн салбарыг хөдөлгөж байгаа гол бүтээгдэхүүн. Дизель түлш хүндэрч байсныг мөн нааштайгаар шийдэж, нөөцөө бэлдэж байна. Одоо өвлийн түлшний нөөцөө бэлтгэж, захиалгаа баталгаажуулж, олон эх үүсвэрээс авахаар яриа явж байна.

АИ-92 автобензиний хувьд дэлхийн даяар маш хүнд, үнэ нь өсөж, олдоц ховор байна. Богино хугацаанд авах арга хэмжээ бол аль болох олон эх үүсвэрээс авахаар яриа хэлцэл хийсээр байна. Дэлхийн хаанаас ч авч болно. Харин Монголын хувьд тээвэр ложистикийн хүндрэлтэй нүүр тулж байна. Нэг бол ОХУ-ын нутгаар, эсвэл БНХАУ-ын нутаг дэвсгэрээр дамжуулан авдаг. Энэ өгөгдсөн боломж, нөхцөлдөө тааруулан аж ахйн нэгж байгууллагуудтайгаа хамтран асуудлаа шийдээд явж байна.