10 жилийн өмнө нэг хүнд ногдох гадаад өр 15 сая төгрөгт хүрлээ гэх мэдээлэл гарч, “дөнгөж төрсөн хүүхэд хүртэл ийм хэмжээний өртэй төрж байна” гэх шүүмжлэл гарч байв. Тухайн үед энэ тоо өндөр санагдаж, гадаад өр нэмэгдэж байгаад олон нийт ихээхэн анхаарч байлаа. Үүнээс хойш 10 жилийн хугацаа өнгөрөхөд нэг хүнд ногдох нийт өрийн хэмжээ ойролцоогоор 3 дахин нэмэгдэж 40 сая төгрөгт хүрлээ. 

Гадаад зээл нь дотроо олон янз. Засгийн газар, банк, аж ахуйн нэгжүүд гадаадаас зээл авдаг. Харин эдгээрээс татвар төлөгчдөд шууд хамааралтай нь Засгийн газрын өр. Засгийн газрын өр сүүлийн жилүүдэд хэрхэн өссөн, цаашид төсөвт ямар дарамт үүсгэхээр байгааг харья. 

Сүүлийн хоёр жилд Засгийн газрын өр 20 их наяд төгрөгөөр нэмэгджээ. 2016 онд Засгийн газрын өр 22.3 их наяд төгрөг байсан бол 2025 онд 35.4 их наяд төгрөгт хүрчээ. Харин 2026 онд 45.6 их наяд, 2027 онд 56.6 их наяд төгрөгт хүрэхээр 2027 оны төсвийн төсөлд тусгажээ. Ингэснээр Засгийн газрын өр 2027 онд 11 их наяд төгрөгөөр нэмэгдэж, ДНБ-ий 50 орчим хувьд хүрэхээр байна. Төсвийн тогтвортой байдлын хуулинд зааснаар Засгийн газрын өр ДНБ-ий 60 хувиас хэтрэхгүй байх зохицуулалттай. Тиймээс 50 хувь гэдэг нь хуулийн хязгаарыг давсан үзүүлэлт биш ч өрийн дарамт, эрсдэл өндөр хэвээр байна. 

Ирэх онд мега төслүүдээс бусад гадаад зээлийн ашиглалт 1.4 их наяд, Засгийн газрын дотоод үнэт цаасны арилжаа хоёр их наяд, орон нутгийн үнэт цаас нэмж гаргахад 600 тэрбум төгрөг байхаар тусгажээ. Засгийн газар ирэх онд нийт санхүүжилтийн хэрэгцээний 40 гаруй хувийг дотоод үнэт цаасны эх үүсвэрээр санхүүжүүлж, төсвийн алдагдлыг нөхнө гэж тооцжээ. Тухайлбал, Өмнөговь аймгаас Даланзадгадын 50 МВт-ын ДЦС төсөлд 300, Дулааны V цахилгаан станцын төслийг санхүүжүүлэхэд 300 тэрбум төгрөгийн үнэт цаас гаргана. Үүнээс гадна эрчим хүчний тулгамдсан дэд бүтцийг шийдвэрлэхэд 1.1 тэрбум ам.доллар хүртэлх өрийн баталгаа гаргах аж.