Ерөнхий сайдын захирамжаар байгуулагдсан шатахууны шуурхай штабаас шатахуунтай холбоотой мэдээллийг Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв танилцууллаа. 

Тэрээр "Өнгөрсөн 24 цагийн хугацаанд Улаанбаатар хотын 95 шатахуун түгээх станцад 1135 тонн, орон нутгийн 42 шатахуун түгээх станцад 556 тонн АИ-92 автобензин нийлүүлж ажилласан. Өнөөдрийн байдлаар Монгол Улсын хэмжээнд нийт 7680 тонн АИ-92 автобензиний нөөц байна. Үүнээс Толгойт, Рашаант, Дархан, Эрдэнэт, Сайншанд өртөөнд 86 вагон буюу 5160 тонн АИ-92 автобензин хүргэгдээд байна. Одоо аж ахуйн нэгжүүд тухайн бүтээгдэхүүнийг буулгаж, Улаанбаатар болон орон нутагт түгээхээр ажиллаж байна.

Мөн бид БНХАУ-аас 8000 тонн АИ-92 автобензин авахаар гэрээ байгуулсан. Аж ахуйн нэгжүүд уг бүтээгдэхүүнийг худалдаж авсан бөгөөд өчигдрөөс эхлэн Улаанбаатар хотод орж ирж, буулгалт хийгдэн, түгээлтэд гарч байна. Үүнээс гадна БНСУ-аас 12 мянган тонн автобензин Монгол Улсад нийлүүлэхэд бэлэн болсон. Одоо аж ахуйн нэгжүүд өөрсдийн авах хэмжээндээ тохируулан хуваарилалтаа хийж байна.

ОХУ-д үүссэн нөхцөл байдалтай холбоотойгоор тодорхой хэмжээнд шатахууны ачилт багассан. Манай улс шатахуунаа Ангарскийн нефть боловсруулах үйлдвэрээс авдаг. Тус үйлдвэр нь өөрсдийн боломжит нөхцөлөөр 100 хувь хүчин чадлаараа ажиллаж, ачилт хийж байгаа гэсэн мэдээллийг бидэнд өгсөн. Тиймээс ойрын өдрүүдэд ачилтын хэмжээ нэмэгдэхээр байгаа.