Засгийн газраас багш нарын цалингийн эх үүсвэрийг яаралтай шийдвэрлэх зорилгоор 2026 оны төсвийн тодотголын төслийг УИХ-д нэн яаралтай горимоор өргөн барьж, УИХ-ын ээлжит бус чуулганыг зарлан хуралдуулсан. Гэвч есдүгээр сар дуусах дөхөж байхад эрх баригч намын дотоод хагаралаас болж УИХ-ын гишүүдийн ирц бүрдэхгүй, төсвийн тодотголыг эцэслэн хэлэлцэж чадахгүй мухардалд орлоо.

Н.Учралын Засгийн газар байгуулагдаад хоёр хуваагдсан багш нарын цалингийн асуудлыг шийдэж, нэмэгдлийг 50 хувь болгосон. Тиймээс 2026 оны батлагдсан төсөвт суусан багш нарын цалингийн санхүүжилтийн эх үүсвэр энэ сараас дууссан. Төсвийн хуулийн зохицуулалтаар нэмэлт эх үүсвэрийг баталж өгөхгүй бол Боловсролын яам болон аймаг, нийслэлийн Боловсролын газруудаас сургуулиудын санхүүжилтийг шилжүүлэх эрх зүйн боломжгүй болоод байна.

Төсвийн тодотголд багш, ажилтнуудын цалингийн дутагдлыг нөхөхөд зориулж 120 гаруй тэрбум төгрөгийн нэмэлт эх үүсвэрийг төсөвлөсөн. Улсын хэмжээнд сургуулийн өмнөх болон ерөнхий боловсролын салбарт ажиллаж буй 50000 гаруй багш, ажилтан энэхүү санхүүжилтээс цалингаа авах юм. Сар бүрийн 25-аас ирэх сарын 1-ний хооронд төрийн албан хаагчдын цалингийн гүйлгээ хийгддэг боловч УИХ-ын ирц хүрээгүйгээс төсөв батлагдаагүй тул есдүгээр сарын цалин хүлээгдэх магадлалтай болов. Учир нь төсөвт суугаагүй, зориулалтын бусаар төсвийг ашиглавал Засгийн газар өөрөө хууль зөрчинө. Тиймээс заавал төсвийн тодотголд багш нарын цалингийн эх үүсвэрийг суулгах ёстой. Гэтэл эрх баригч намын хагарал, сөрөг хүчний шаардлагаас болж УИХ хуралдаж чадахгүй, төсвийн тодотголоо хэлэлцэж чадахгүй есдүгээр сар дуусаж байна.