Төсвийн тодотголыг намрын чуулган эхлэхээс өмнө баталж, ирэх арваннэгдүгээр сарын 1-ээс тэтгэвэр, цалинг нэмэхээр Засгийн газар тооцож байсан ч өнөөдрийг хүртэл УИХ-аар эцэслэн баталсангүй. Тодотгол батлагдвал 769 мянган төгрөгийн тэтгэвэр авч байгаа иргэдийн тэтгэвэр 300 мянган төгрөгөөр нэмэгдэхээс гадна төрийн үйлчилгээний албан хаагчдын цалинг нэмэх боломж бүрдэх юм. Гэвч эдийн засагчид төсвийн орлого тасарсан энэ үед зарлага нэмэгдүүлэх нь инфляц болон өрийн дарамтыг нэмэгдүүлэх эрсдэлтэй гэж үзэж байгаа бол улстөрчдийн байр суурь зөрж, зарим нь тодотголыг яаралтай батлах шаардлагатай гэж үзэж байна. 

Ерөнхий сайд Н.Учрал: Төсвийн тодотгол батлагдвал арваннэгдүгээр сарын 01 гэхэд 769 мянган төгрөгийн тэтгэвэр 300 мянган төгрөгөөр нэмэгдэнэ. Хүнд цаг үед сайд дарга нарын зардлыг хасаад иргэдийн орлогыг нэмэгдүүлье л гэж хичээж байна. Би өөрийнхөө барьсан төсөвтөө итгэлтэй байгаа. Би тэтгэвэр тэтгэмж нэмэгдүүлнэ гэдэгтээ ч итгэлтэй байгаа. Би эдийн засгийг эрүүлжүүлнэ, хоёр тулгууртай болгоно гэдэгтээ ч итгэлтэй байна. 

МУИС-ийн Шинжлэх ухааны сургуулийн эдийн засгийн тэнхимийн багш профессор Б.Отгонтөгс: Хэрэв цалинг нэмэх байсан бол 2026 оны нэг сараас эсвэл зургаан сарын 1-ээс тооцож явах ёстой байсан. Өнгөрсөн дөрвөн сараас эхлэн төрийн албан хаагчийн цалин болон тэтгэврийг нэмэх талаар ярьсан. Гэхдээ төсвийн орлого дутуу одоогийн нөхцөлд энэ боломжгүй. Тодотголоор нэмэх гэж байгаа мөнгө нь манай улсад ч, Сангийн яамд ч байхгүй. Засгийн газраас үүнийг гурван аргаар олно гэж байгаа.