Сонгинохайрхан дүүргийн Баянхошуунд хүүхэд, залуучууд болон бичил бизнес эрхлэгчдэд шинэ боломж нээх зорилготой “Өсөлт хөгжлийн төв” үүд хаалгаа нээлээ. Нийслэлийн Бизнес, инновацын газар болон “Рио Тинто Монгол” ХХК хамтран байгуулсан тус төв нь иргэдийн бизнес эрхлэх, ур чадвараа хөгжүүлэх, хөдөлмөрийн зах зээлд бэлтгэхэд чиглэсэн сургалт, хөтөлбөрүүдийг нэг дор хэрэгжүүлэх юм.

“Өсөлт хөгжлийн төв” нь албан ёсны нээлтээ хийхээс өмнөх хоёр сарын хугацаанд туршилтын байдлаар ажиллаж, үйл ажиллагааныхаа эхний үр дүнг гаргажээ. Энэ хугацаанд 60 гаруй бичил бизнес эрхлэгч бизнесээ эхлүүлэх, өргөжүүлэх чиглэлээр дэмжлэг авсан бол 300 гаруй хүүхэд, залуус англи хэлний сургалтад хамрагдсан байна. Мөн 120 хүүхэд Жюү Жицү спортоор тогтмол хичээллэж, 150 гаруй залуусыг хөдөлмөрийн зах зээлд бэлтгэх сургалт, хөгжлийн хөтөлбөрт хамруулжээ. Түүнчлэн зарим залуус “Оюу толгой” компанийн ханган нийлүүлэгч байгууллагуудад дадлага хийж, ажлын туршлага хуримтлуулах боломжийг нээсэн байна.

Энэ төвийг Баянхошуун дахь иргэдийн хэрэгцээнд тулгуурлан байгуулжээ. Тус бүсэд 60 мянга гаруй хүн амьдардгаас 31,865 нь хөдөлмөрийн насныхан байна. Төслийг хэрэгжүүлэхийн өмнө хийсэн орон нутгийн хэрэгцээний судалгаагаар иргэдийн 53 хувь нь ажлын байрны боломжийг нэмэгдүүлэх шаардлагатай гэж үзсэн бол 71.6 хувь нь хүүхэд, залуучуудад зориулсан хөгжлийн орон зай шаардлагатай гэж хариулжээ. Тиймээс “Өсөлт хөгжлийн төв” нь зөвхөн сургалт зохион байгуулах орон зай бус, иргэдэд өөрсдийн ур чадвар, санаачилгаа хөгжүүлж, бизнесээ эхлүүлэх, ажлын байртай болоход нь дэмжлэг үзүүлэх төв болон ажиллах юм.