Хууль зүй, дотоод хэргийн сайдаар Г.Тэмүүлэнг томилох асуудлыг хэлэлцэх чуулганы хуралдаан ирц бүрдээгүйн улмаас даваа гараг хүртэл хойшлуулсан. Энэ нь УИХ дахь МАН-ын бүлгийн хагарал ямар түвшинд хүрснийг, мөн намын даргынхаа байгуулсан Засгийн газрыг унагахад бэлэн байгааг харуулсан үйл явдал болов.

Тэгвэл ирэх даваа гарагт ч чуулганы ирц бүрдэхгүй байх магадлал өндөр байна. Учир нь Ерөнхийлөгч У.Хүрэлсүх НҮБ-ын 81 дүгээр чуулганд оролцохоор АНУ-ыг зорих бөгөөд түүний бүрэлдэхүүнд Засгийн газрын хэд хэдэн гишүүнээс гадна УИХ-ын гишүүд багтжээ. Тэд бүгд МАН-ын олонхын талын гишүүд бөгөөд долоо хоног эзгүй байна. Тиймээс амралтын өдрүүдэд МАН-ын бүлэг дотоод сөргөлдөөнөө шийдвэрлэж, тохиролцоонд хүрэхгүй бол ирэх долоо хоногт ч чуулганы ирц бүрдэхгүй байх магадлалтай.

УИХ-ын даргын зүгээс АН-ын бүлгийн 42 гишүүнээс 27 нь үндэслэлгүйгээр чуулган тасалсан, ирцээ бүрдүүлээгүй гэж мэдэгдсэн ч, сөрөг хүчний хувьд хуралдаанд суухгүй гэсэн байр сууриа илэрхийлсэн. Иймд даваа гарагт гурав хоногийн завсарлагааны хугацаа нь дуусах ч АН хуралдаанд оролцохгүй.

Иймээс эрх баригч МАН өөрсдөө ирцээ бүрдүүлэх шаардлагатай нүүр тулж байна. Өчигдрийн хуралдаанаар МАН-ын 16 гишүүн чуулганаа тасалж, 8 гишүүн өвчтэй болон чөлөөтэй гэх шалтгаанаар хуралдааныг орхисон. Ирцэндээ ороогүй МАН-ын бүлгийн 20 гаруй гишүүний ихэнх нь цөөнх талынхан байгаа юм.