Монгол Улс элэгний хорт хавдраараа дэлхийд тэргүүлдэгтэй холбоотойгоор "Хамгийн чухал нь эрүүл мэнд-2026" арга хэмжээний үеэр Монгол дахь гепатит дельта вирусийн халдварын шалтгаан, эрсдэлийн хүчин зүйлсийг судалж буй Бичил амь судлалын тэнхимийн вирус судлалын профессор, Япон судлаач Такааки Коматай товч ярилцлаа.

-Монгол Улсад элэгний гепатит дельта вирусийн халдварын тархалт өндөр байдгийн шалтгааныг та судалж байгаа. Тэгвэл монголчуудад энэ вирус голчлон ямар замаар халдварлаж байна вэ?

-Хамгийн түрүүнд Монголд онцлог байж болох хэд хэдэн эрсдэлийн хүчин зүйлсийг тодорхойлох шаардлагатай. Бидний эхний таамаглалаар монголчууд дээр үеэс гэр бүлийн хүрээнд тариур, зүүг дамжуулан хэрэглэж байсан эрсдэл, мөн шивээс, гоо сайхан зэрэг халдвар хамгааллын нөхцөл дээр хайнга хандсан зэрэг олон хүчин зүйл нөөлөлж байж болно. Эдгээрийн аль нь гепатит дельта вирусийн халдвартай холбоотой болохыг шинжлэх ухааны үндэслэлтэйгээр тогтоохын тулд бид SATREPS төслийн хүрээнд тархвар зүйн судалгаа хийхээр төлөвлөж байна. Судалгаанд тодорхой бүлгийн иргэдийг хамруулж, цусны шинжилгээ болон асуумжийн судалгааг хослуулна.

Цусны шинжилгээгээр тухайн хүн халдвар авсан, эсэхийг тодорхойлохын зэрэгцээ асуумжаар өмнө нь ямар эмнэлгийн тусламж үйлчилгээ авч байсан, ямар зан үйл болон үйлдэл нь халдвар авах эрсдэлтэй холбоотойг судална. Өөрөөр хэлбэл, Монголд яагаад гепатит дельта вирусийн халдвар ийм өндөр байна вэ гэсэн асуултын хариуг хүн амын түвшинд тодорхойлохыг зорьж байгаа юм.