Хууль зүй, дотоод хэргийн сайдаар Г.Тэмүүлэнг танилцуулах УИХ-ын чуулганы ирцийг 12:00 цагаас хойш бүрдүүлсэн ч ирц хүрсэнгүй. 17:30 цагт УИХ-ын дарга С.Бямбацогт орж ирж үг хэлээд, чуулганы хуралдааныг ирэх долоо хоногийн даваа гараг хүртэл хойшлуулж байгаагаа хэллээ.

Тэрээр “УИХ-ын чуулганы нэгдсэн хуралдаан 14:00 цагт эхлэх ёстой. Одоогийн байдлаар 126 гишүүнээс 52 гишүүн буюу 41.3 хувийн ирцтэй байна. Ажлын цаг дуусаж байгаа учраас өнөөдрийн чуулганыг ирц хүрээгүй шалтгаанаар хойшлуулж байна.

Нийт 49 гишүүн хүндэтгэн үзэх шалтгаангүйгээр хүрэлцэн ирсэнгүй. Аль нэг бүлэглэл, нам гэж улстөржмөөргүй байна. МАН-ын 68 гишүүнээс 44 гишүүн ирцэндээ орсон. Эмнэлгийн чөлөөтэй 2, томилолттой 8, чуулганы хуралдаан тасалсан: Д.Амарбаясгалан, Х.Болормаа, Б.Тулга, С.Лүндэг, Л.Оюун-Эрдэнэ, М.Ганхүлэг, Ж.Ганбаатар, О.Батнайрамдал, Н.Алтаншагай, С.Амарсайхан, А.Ариунзаяа, М.Энхцэцэг, О.Саранчулуун, Ц.Идэрбат. Үндэсний эвсэлийн 4 гишүүн ирээгүй.

АН-ын бүлгийн 42 гишүүнээс Д.Ганбатаас бусад нь орж ирсэнгүй. Эмнэлгийн чөлөөтэй болон томилолттой гишүүдээс гадна 27 гишүүн тасалсан. Ирц хүрээгүй учраас даргын дэргэдэх зөвлөл цахимаар хуралдаж даваа, мягмар гарагт чуулганы хуралдааныг хойшлууллаа” гэлээ.