Монгол Улсын Шүүхийн шийдвэр гүйцэтгэх байгууллага Монгол төрийн ууган байгууллагуудын нэг бөгөөд өнөөдрийн байдлаар үйл ажиллагаа нь хэвийн үргэлжилж байгаа мэт боловч зарим нэгэн дотоод үйл ажиллагаа нь болохгүй байгаа талаар Шүүхийн шийдвэр гүйцэтгэх ерөнхий газрын дарга А.Намсаманд тэргүүтэй алба хаагчид мэдээлэл хийлээ.

Тэрээр “Хорих байрны аюулгүй байдал болон цаашид аюултай нөхцөл байдал үүсэж болзошгүй асуудал яригдаж байна. Мөн иргэний шийдвэр гүйцэтгэх ажиллагааны хүрээнд өндөр үнийн дүнтэй зарим материал дээр хууль, журмын дагуу шийдвэр гүйцэтгэх ажиллагаа явуулж, үүргээ хэвийн хэрэгжүүлэх боломжгүй байна гэсэн санал, хүсэлт бидэнд өдөр тутам ирж, энэ талаар ажилтнууд ч ярьж байна. Тиймээс аюулгүй байдлын үнэлгээг бид өдөр тутам хийж, хэлэлцэж байгаа.

Сүүлийн үед Хууль зүй, дотоод хэргийн сайдаас Цагдаагийн байгууллагын зарим алба хаагчдад хууль бус үүрэг өгсөн байж болзошгүй гэх мэдээлэл гарч байна. Үүнтэй холбоотойгоор манай байгууллагын удирдлагын томилгоо, үйл ажиллагаатай холбоотой асуудлыг ч анхаарах шаардлагатай байна. Тухайлбал, Хууль зүй, дотоод хэргийн сайдын шууд томилдог, бүх хорих байгууллагыг хариуцдаг тэргүүн дэд дарга гэж албан тушаал бий. Энэ албан тушаалтны зүгээс төрийн болон албаны нууцын тухай хууль зөрчсөн байж болзошгүй асуудлууд удаа дараа гарч байгаа. Хорих байгууллагын аюулгүй байдал гэдэг нь зөвхөн тухайн байгууллагын дотоод аюулгүй байдлын асуудал биш. Хорих байгууллага байрлаж байгаа бүс нутаг, орон нутгийн аюулгүй байдал, цаашлаад улсын аюулгүй байдалтай шууд холбоотой асуудал. Тиймээс удаа дараа зөрчил гаргаж, байгууллагын, ялангуяа аюулгүй байдалд ноцтой хор хохирол учруулж болзошгүй нөхцөл байдал үүссэн гэж үзэж байгаа асуудлуудыг хууль, хяналтын байгууллагаар шалгуулахаар төлөвлөж байна.