Нийслэлийн Засаг дарга бөгөөд Улаанбаатар хотын Захирагч Б.Пүрэвдагва болон НЗДТГ-ын холбогдох албан тушаалтнууд нийслэлийн хэмжээнд хэрэгжиж байгаа төсөл, хөтөлбөрүүдийн хэрэгжилт, хотын цаашдын хөгжлийн төлөвлөлт, бодлогын талаар танилцууллаа.

Улаанбаатар хотын Захирагч Б.Пүрэвдагва: Улаанбаатар хот анх 500 мянган хүнд зориулан төлөвлөгдсөн хот. Гэтэл сүүлийн 35 жилийн хугацаанд нийслэлийн газар нутгийн хэмжээ зургаа дахин томорч, хүн амын тоо гурав дахин нэмэгдсэн. Ингэснээр олон асуудал бий болсон. Үүний хамгийн том илрэл нь бидний өдөр тутам тулгардаг түгжрэл, агаарын бохирдол, хотын хүртээмжийн асуудал юм.

Өнөөдөр Улаанбаатар хотын хүртээмж муутай хэсэгт нийт иргэдийн 65 хувь нь амьдарч байна. Бид 2000-2020 он хүртэл хэрэгжүүлэх ерөнхий төлөвлөгөөтэй байсан ч 20 жилийн хугацаанд төлөвлөгөөний хэрэгжилт ердөө 29.6 хувьтай байна. Үүнээс шалтгаалаад өнөөдрийн бетонон ширэнгэ, хүртээмжгүй орчин бий болсон. Үүний гол шалтгаануудын нэг нь улстөржилт байсан гэж харж байна.

Тиймээс одоо бид 2040 он хүртэлх Улаанбаатар хотын ерөнхий төлөвлөгөөг батлах шаардлагатай. Одоогоор Барилга, хот байгуулалтын яам ерөнхий төлөвлөгөөгүй явж байгаа. Тиймээс энэ намрын чуулганаар 2040 он хүртэлх ерөнхий төлөвлөгөөгөө батлуулах зорилготой ажиллаж байна. Өмнөх төлөвлөлтийн алдаанаас шалтгаалж өнөөдөр нийт 689 барилга зөвшөөрөлгүй баригдсан байна.