2026 оны төсвийн тодотголыг УИХ-аар хэлэлцэж байна. Тодотголд гэрт ойрхон сургууль бий болгоход 50 тэрбум төгрөгийн санхүүжилт олгохоор тусгасан. Үүний дунд 3 хувийн сургуульд 7.1 тэрбум төгрөгийг өгөхөөр оруулж ирсэн талаар хэлэлцүүлгийн үеэр УИХ-ын гишүүд хөндсөн. Хувийн 3 сургуулийн нэгд Ерөнхий сайд Н.Учралын ээжийн "Их засаг кинг", сургууль байгаа гэсэн мэдээллийг Боловсролын яамны Төрийн нарийн бичгийн дарга Т.Ням-Очир өчигдөр өглөө өгсөн ярилцлагадаа дурдсан. Тодруулбал, "Их Засаг кинг", "Шинэ санаа", "Империал" зэрэг сургуулиудад ачаалал тэнцвэржүүлэх, төрөлжүүлэх чиглэлээр 7.1 тэрбумын дэмжлэг, тоног төхөөрөмж олгохоор төлөвлөсөн гэсэн мэдээлэл гарсан.

Улсын сургуулиудын ачааллыг бууруулах зорилготой сонгосон 3 хувийн сургууль нь бүгд Хан-Уул дүүрэгт байгаа нь мөн шүүмжлэл дагуулаад байгаа. Тэгвэл төсвийн тодотголд тусгасан гэрт ойрхон сургуулийн талаар болон үүнд Ерөнхий сайдын ээжийн сургууль байгаа, эсэх талаар Боловсролын яамны Төрийн бичгийн дарга Т.Ням-Осороос тодруулахад “2026 оны төсвийн тодотгол дээр нийслэлийн сургуулиудын ачааллыг бууруулах, бүлэг дүүргэлтийг багасгах зорилгоор 50 тэрбум төгрөгийн тодотгол оруулж ирж байгаа. Нэг нь хотхон хороололд байгуулах бага сургуулийг түрээслэхэд 13.9 орчим тэрбум төгрөгийг тавьсан. Хоёрт, орчин нөхцөлийг нь иж бүрэн тохижуулахад тоног төхөөрөмж, гуравт, төрөлжсөн ахлах сургууль бий болгоход нэг сургуульд 15 тэрбум төгрөг тавьсан.

Улсын төсвийн мөнгөөр хувийн сургуульд тоног төхөөрөмж, тавилга, эд хогшил худалдаж авч өгөх эрх зүйн ямар ч боломжгүй. Гэрт ойрхон сургууль, төрөлжсөн ахлах сургуулиудыг хөгжүүлэх хүрээнд олон хувилбартай санал гаргасан. Энэ хүрээнд төрийн өмчийн хоёр ахлах сургуулийг эхлүүлсэн. Төрийн шаардлагыг хүлээж аваад хамтарч ажиллах хувийн сургуулиудтай яриа хэлэлцээрт орж байгаа. Боловсролын яамны ажлын хэсэг 4,5 сургууль дээр судалгаа хийгээд, нэгтэй нь хамтарч ажиллаж байна. Тэр сургууль өөрийн байр, тоног төхөөрөмж, боловсон хүчинтэй учраас төрөөс нэмэлт хөрөнгө оруулалт шаардлагагүй. Харин хөтөлбөр хэрэгжүүлэхэд гарах өртөгт хувьсах зардал олгох юм.