Хүнсний нэмэлт бүтээгдэхүүн Монгол Улсад оруулж ирвэл заавал бүртгүүлж, лабораторид шинжилгээнд орох ёстой. Дотор нь хортой бодис байгаа эсэхийг мэдэхгүйгээр худалдан борлуулах ёсгүй талаар мөн салбарын цаг үеийн асуудлаар Эрүүл мэндийн сайд Э.Батшугар мэдээлэл өглөө. 

Тэрээр “Энэ зун Монгол Улс олон улсын стандартын шаардлага хангасан эмийн лабораторитой болсон. Ерөнхий сайдын өгсөн чиглэлийн дагуу эмүүдийг түүврээр авч, тус лабораторид шинжилж байгаа. Одоогийн байдлаар хоёр төрлийн эмийг зах зээлээс татсан. Нэг нь бөөлжилтийн эсрэг эм, нөгөө нь яс сийрэгжилтийн эсрэг витамин байсан. Эдгээр нь Хятад болон Индонезоос гаралтай эмүүд. Нэг эмийг нь бүрэн устгалд оруулсан, нөгөө эмийг нь одоо устгалд оруулж байна. Нэг төрлийн тариа гэхэд маш олон төрлийн брэнд байдаг. Тэдгээрээс нэг тариа стандартын шаардлага хангаагүй нь тогтоогдсон. Тухайн эмд биохимийн шинжилгээ хийсэн.

Одоогийн байдлаар гаднаас хоёр төрлийн тураах эмийг Монгол Улсад оруулж ирж байна. Хувийн хэрэгцээндээ болон зарж борлуулах зорилгоор оруулж ирж байгаа. Нэг нь Оземпик гэх тариа, нөгөө нь Манжаро. Оземпикийг Монгол Улсад оруулж ирсэн нэг удаагийн бүртгэл байгаа бөгөөд нэг удаад 2000-3000 ширхэгийг оруулж ирсэн тохиолдол байна. Ер нь эм, эмнэлгийн зориулалттай бүтээгдэхүүнийг оруулж ирэхдээ заавал бүртгүүлэх ёстой. Мөн хүнсний нэмэлт бүтээгдэхүүнийг арилжааны журмаар худалдаалах гэж байгаа бол заавал бүртгүүлсэн байх шаардлагатай юм. Лабораторид шинжилгээ хийлгэж, тухайн бүтээгдэхүүнд хүний эрүүл мэндэд хортой бодис байгаа эсэхийг шалгуулалгүйгээр иргэдэд борлуулах нь буруу.