Ерөнхий сайдын захирамжаар байгуулагдсан шатахууны хангамжийг нэмэгдүүлэх үүрэг бүхий шуурхай штабын ээлжит хурал өнөөдөр боллоо. Хөдөө, орон нутагт байрлах ШТС-уудын дундаж хүлээгдэл 54 машин байгаа юм. Шатахууны шуурхай штабаас цаг үеийн асуудлаар мэдээлэл өглөө. 

АҮЭБЯ-ны Төрийн нарийн бичгийн дарга Б.Дашпүрэв “Өнгөрсөн 24 цагийн хугацаанд Улаанбаатар хотын 160 шатахуун түгээх станцад 2000 тонн АИ-92 автобензин, орон нутгийн 84 шатахуун түгээх станцад 1038 тонн автобензин түгээсэн байна. Өмнө нь мэдээлж байсанчлан одоо бидний гол анхаарч байгаа зүйл бол хөдөө орон нутгийн шатахууны хангамжийг сайжруулах явдал юм. Өнөөдрийн байдлаар 12 суманд автобензиний нөөцгүй, хомсдолтой байна гэсэн мэдээлэл ирсэн. Үүний дагуу эдгээр сум руу өнөөдөр шатахуун ачилт хийж, нийлүүлэлтийг хэвийн болгохоор ажиллаж байна.

Улсын хэмжээнд орон нутгийн шатахууны хангамжийг хэвийн болгох зайлшгүй шаардлагатай байгаа. Ялангуяа хадлангийн улирал болж байгаатай холбоотойгоор хөдөө орон нутгийн хэрэгцээг хэвийн хангах зорилт тавин ажиллаж байна. Өмнө нь улсын хэмжээнд шатахууны нийлүүлэлт доголдож, иргэд оочерлож, зарим тохиолдолд хонон өнжин хүлээдэг байсан. Харин одоо нөхцөл байдал харьцангуй зөөлөрч, шатахууны нөөц бүрдэх боломжтой болж байна. Үүний зэрэгцээ шатахууны эх үүсвэрийг нэмэгдүүлэх чиглэлээр ажиллаж байгаа. ОХУ, БНХАУ-аас бүтээгдэхүүн авахын зэрэгцээ БНСУ болон бусад холбогдох улс орнуудаас бүтээгдэхүүн авах талаар яриа хэлцэл хийж байна.