Монгол Улсад хар тамхи, мансууруулах бодистой холбоотой гэмт хэрэг, зөрчил жил ирэх тусам нэмэгдэж байна. Хамгийн их анхаарал хандуулах асуудал нь холбогдогчдын нас улам залуужиж байгаа явдал юм.

Цагдаагийн ерөнхий газрын Хар тамхитай тэмцэх албаны мэдээллээр 2026 оны эхний улиралд мансуурахтай холбоотой 124 зөрчил бүртгэгдсэн нь өмнөх оны мөн үеэс 51.2 хувиар нэмэгджээ. Энэ төрлийн гэмт хэрэг, зөрчлийн тоо өсөхийн зэрэгцээ холбогдогчдын нас залуужжээ. Сүүлийн таван жилд цагдаагийн байгууллагад 1043 гэмт хэрэгт 1673 хүн холбогдон шалгагдсанаас 91.2 хувь нь 15-35 насны хүүхэд, залуучууд байжээ. Мөн энэ хугацаанд хар тамхи, мансууруулах бодистой холбоотой хэргээр 1297 хүн шүүхээс ял шийтгэл авсан байна.

Прокурорын байгууллагын судалгаагаар мансууруулах эм, сэтгэцэд нөлөөт бодисыг хууль бусаар ашиглах гэмт хэрэгт холбогдогчдын 69 хувь нь 15-30 насныхан байна. Харин 30-40 насныхан 24.3 хувь, 40-50 насныхан 5.8 хувь, 50-иас дээш насныхан ердөө 0.6 хувийг эзэлж байгаа нь энэ төрлийн гэмт хэрэгт залуучуудын эзлэх хувь өндөр байгааг харуулж байна.