Манай сурвалжлах баг Төв аймгийн Баян суманд байрлах Шүүхийн шийдвэр гүйцэтгэх ерөнхий газрын харьяа Согтуурах, мансуурах донтой өвчтөнийг албадан эмчлэх төвд очиж, эмчилгээ, үйлчилгээ, орчин нөхцөл болон тус төвд тулгамдаж буй асуудлуудтай танилцлаа. Өнөөдрийн байдлаар тус төвд согтуурах донтой 58, мансуурах донтой гурван хүн албадан эмчилгээ хийлгэж байна. Жилд дунджаар 400-500 хүнийг хүлээн авч эмчилгээнд хамруулдаг бөгөөд сүүлийн 10 жилийн хугацаанд нийт 5197 хүн хэвтэн эмчлүүлж, 3805 хүн архины хамаарлаас гарчээ.

Тус төвийн үйл ажиллагааны түүх 1961 оноос эхтэй. Тухайн үед БНМАУ-ын Ардын Их Хурлын Тэргүүлэгчдийн 13 дугаар тогтоолоор Сэлэнгэ аймгийн Ерөө суманд “Хөдөлмөр хүмүүжлийн бригад” нэртэйгээр Улсын цагдан сэргийлэх ерөнхий газрын харьяалалд байгуулж байжээ. Харин Согтуурах, мансуурах донтой өвчтэй этгээдийг захиргааны журмаар албадан эмчлэх, албадан хөдөлмөр хийлгэх тухай хууль 2000 онд батлагдсантай холбогдуулан Засгийн газрын 148 дугаар тогтоолоор Шүүхийн шийдвэр гүйцэтгэх ерөнхий газрын харьяалалд шилжүүлсэн байна. Улмаар 2003 онд Төв аймгийн Баян сум дахь одоогийн байршилд нүүн иржээ.

Тус төвд албадан эмчлүүлж буй хүмүүсийн дийлэнх нь 30-50 насныхан бөгөөд нийт үйлчлүүлэгчдийн 73.3 хувийг эзэлж байна. Боловсролын түвшнийг авч үзвэл 73.8 хувь нь бүрэн болон бүрэн дунд боловсролтой бол 10.5 хувь нь орон гэргүй иргэд байна. Хуулийн нэмэлт, өөрчлөлтийн дагуу анх удаа албадан эмчлүүлж буй хүнийг 3-6 сар, давтан эмчлүүлэгчийг 6 сараас 2 жил хүртэлх хугацаанд албадан эмчилгээнд хамруулдаг. Энэ хугацаанд шүүхийн шийдвэрийн дагуу эмчлүүлж буй иргэдэд архины хордлого тайлах, архины дуршил бууруулах, архийг зохихгүй болгох болон шинж тэмдгийн эмчилгээ хийхээс гадна сэтгэл зүйн тусламж, үйлчилгээ үзүүлж байгаа юм. Ингээд бид тус төвийн өдөр тутмын үйл ажиллагаа, эмчилгээний явц, өвчтөнүүдийн орчин нөхцөл ямар байгаа болон эмчилгээний дараах үр дүн, тулгамдаж буй асуудлыг газар дээр нь тодрууллаа.