Засгийн газар 2027 оны төсвийн тухай хуулийг УИХ-д өргөн мэдүүлсэн. Тэнцвэржүүлсэн орлогыг 41,3 их наяд, төсвийн зарлагыг 43,6 их наяд төгрөг байхаар өргөн барьсан төсвийн талаар УИХ-ын гишүүн П.Сайнзоригтой ярилцлаа.

-Засгийн газар төсвийн зарлагыг найм, есөн их наядаар нэмэгдүүлж өргөн барилаа. Төсвийг ингэж их тэлэх нь буруу гэсэн шүүмжлэл хэдийнээ гараад эхэлсэн. Та хувь гишүүнийхээ хувьд энэ удаагийн төсвийг хэрхэн дүгнэж байна вэ?

-Хуулийн төслийг өчигдөр аваад уншиж байна. УИХ өнгөрсөн хавар хэд хэдэн чухал хууль баталсан. Тухайлбал, Нийгмийн даатгалын ерөнхий хуульд өөрчлөлт оруулж, суурь тэтгэвэр нь 2.5 сая төгрөгөөс бага байгаа тэтгэвэр авагчдын тэтгэврийн зөрүүг багасгасан. Үүнд 2.6 их наядын эх үүсвэр шаардлагатай гэдэг нь хууль хэлэлцэж байхад л яригдаж байсан. Мөн эмч, багш нарын цалингийн нэмэгдлийг цэгцлээд явсан. Үүнд тодорхой хэмжээний зардал нэмэгдсэн. Энэ мэт шийдвэрүүдийг УИХ өөрөө гаргаж, хуулийг нь баталсан. Төсвийн урсгал зардал нэмэгдэж байгаад санаа зовж байгаа боловч нөгөө талдаа орлогоо хэрхэн нэмэгдүүлэх вэ гэдгээ л ярих ёстой. Татварын бааз сууриа нэмэгдүүлэхдээ яг одоо төлж байгаа хэсэг гэхээсээ илүү шинээр татвар төлөгчдийг бий болгох, уул уурхайн төслүүдийг дэмжиж явуулахаас аргагүй.

Мөн Төрийн болон орон нутгийн өмчийн засаглалын тухай хуулийг УИХ баталсан. Энэ хуулийг баталснаар төрийн өмчит компаниуд төсвийн харилцаанд орж ирэх болсон. Засгийн газар хувьцаа эзэмшигчийнхээ хувьд төрийн өмчит компаниудаас ногдол ашиг авах ёстой. Үүнийгээ төсөв дээрээ суулгаад ямар дэд бүтцийн бүтээн байгуулалт хийх вэ гэдгээ тодорхой оруулж ирэх ёстой. Энэ бүх шалтгаанаас болоод төсвийн зарлага нэмэгдсэн. Төсвийн энэ өсөлтийг баталсан хуулиудаа хэрэгжүүлэхдээ зарцуулахдаа маш зөв эрэмбэлэх  хэрэгтэй. Нэгд, найдвартай эрчим хүчний эх үүсвэр, дэд бүтцээ нэмэгдүүлэх төсөл байна уу. Монгол Улсын үндэсний аюулгүй байдалд шаардагдах дэд бүтцийн дэмжиж чадаж байна уу гэдэг дээр л анхаарах ёстой.