Японы Гадаад хэргийн сайд Мотэги Тошимицү-ийн Монгол Улсад айлчлалыг албан ёсоор зарлажээ. Японы Гадаад хэргийн яамнаас мэдээлснээр Мотэги Тошимицү наймдугаар сарын 29-нөөс есдүгээр сарын 4-ний хооронд Туркменистан, Словак, Австри болон Монгол Улсад айлчлах юм байна. Тэрээр есдүгээр сарын 2-нд Улаанбаатарт ирж, есдүгээр сарын 3-нд Япон руу буцах хуваарьтай.

Айлчлалын үеэр Японы Гадаад хэргийн сайд Монголын Гадаад харилцааны сайд болон Засгийн газрын бусад өндөр түвшний албан тушаалтнуудтай уулзаж, хоёр орны харилцаа, хамтын ажиллагааны талаар санал солилцохоор төлөвлөжээ.

Японы талын мэдээлснээр уулзалтаар эрчим хүч, дэд бүтэц, шинжлэх ухаан, технологийн салбарын хамтын ажиллагааг бэхжүүлэх, мөн хууль дээдэлсэн чөлөөт, нээлттэй олон улсын дэг журмыг хадгалан бэхжүүлэх чиглэлээр стратегийн хамтын ажиллагааг эрчимжүүлэх асуудлыг хэлэлцэхээр төлөвлөж байна.

Мотэги Тошимицү өмнө нь 2020 оны аравдугаар сард Монгол Улсад айлчилж, тухайн үеийн Ерөнхийлөгч Х.Баттулга, Ерөнхий сайд У.Хүрэлсүх нарт бараалхан, Гадаад харилцааны сайдтай уулзаж байсан юм. Тухайн айлчлалаар хоёр улс “стратегийн түншлэл”-ээ бэхжүүлэх, 2022 он хүртэлх дунд хугацааны үйл ажиллагааны шинэ төлөвлөгөө боловсруулах чиглэлээр хамтран ажиллахаар тохиролцож байжээ.

Энэ удаагийн айлчлалын үеэр хоёр улсын харилцааг цаашид хэрхэн өргөжүүлэх, ялангуяа эрчим хүч, дэд бүтэц, шинжлэх ухаан, технологийн салбарт Японы оролцоог нэмэгдүүлэх асуудал анхаарлын төвд байх төлөвтэй байна.