Өргөн хэрэглээний барааны үнэ өсөж, шатахууны хомсдол үүсэж, инфляц 13 хувьд хүрсэн энэ үед УИХ-ын чуулган завсарлаад байгаа.Тэгвэл УИХ-д суудалтай хоёр том намын бүлэг ээлжит бусаар хуралдаж нийгэм, эдийн засгийн нөхцөл байдлын талаар ярилцаад ч дорвитой шийдэлд хүрч чадсангүй, намрын ээлжит чуулганыг хүлээхээр болжээ. УИХ дахь АН-ын бүлэг энэ сарын 20-нд ээлжит бусаар хуралдаж, "Иргэдийн орлогыг хамгаалах, шатахуун, эрчим хүчний аюулгүй байдлыг хангах тухай" УИХ-ын тогтоолын төслийг хэлэлцсэнээ танилцуулсан. Гэхдээ чуулганы завсарлагааны үе таарч байгаа учраас намрын чуулганыг хүлээхээс наашгүй. Сөрөг хүчин ээлжит бус чуулганыг яаралтай хуралдуулж, 2026 оны төсвийн тодотголоо хэлэлцэхийг шаардсан ч эрх баригч нам хүлээж аваагүй. Эрх баригч намын тухайд энэ сарын 25-нд Их тэнгэрт бүлгээ ээлжит бусаар хуралдуулж нийгэм, эдийн засгийн нөхцөл байдлын талаар хэлэлцсэн. Гэхдээ бүлгийн 64 гишүүнээс 34 гишүүн ирсэн учраас мөн л ямар нэгэн шийдэлд хүрч чадаагүй. Харин Засгийн газраа тогтвортой байлгах дээр бүлгийн 64 гишүүн 100 хувь санал нэгдсэн гэсэн мэдээллийг тарааж эхэлсэн. УИХ-ын намрын ээлжит чуулган есдүгээр сарын 15-нд нээлтээ хийнэ. Тиймээс эрх баригч нам ээлжит бус чуулган зарлах шаардлагагүй гэдэг байр суурьтай байгаа аж. Гэхдээ гадаад, дотоодын нөхцөл байдлаас шалтгаалж өдөр өдрөөр өргөн хэрэглээний барааны үнэ өсөж, иргэдийн худалдан авах чадвар муудаж, шатахууны хомсдол үнийн өсөлт нь аж ахуйн нэгж, иргэдийг туйлдуулж байна.
