Ардчилсан нам ээлжит 4:11 мэдээллийн цагаа энэ удаад УИД-ийн урд байрлах бичиг хэргийн үзэсгэлэн худалдааны талбайд хийлээ. Тэд төсвийн тодотголоо УИХ яаралтай хэлэлцэж, данхайсан Засгийн газрын бүтцээ багасгахыг шардав. Мөн дэлхийн газрын тосны нөхцөл байдал хүнд байхад Наадмаар иргэдээ олон хоног амрааж нөөцөө дуусгасан нь Засгийн газрын буруу бодлого гэдгийг хэллээ. Ардчилсан намын дэд дарга Н.Ганибал: 45 хоногийн шатахууны нөөцөө Засгийн газар зөв зарцуулах бодлого гаргах байсан ч чадаагүй. Зөв бодлого гаргасан бол өнөөдөр шатахууны тасалдалд орохгүй намар, өвлийг давах байсан. Монголын төр нэг бол сүртэй, хүчтэй рийл хийдэг дарга нар, үгүй бол алиа марзан байдлаар асуудалд ханддаг дарга нартай л боллоо. Ард түмэн хүүхдүүддээ хичээлийн хэрэгслийг нь авч өгөхөд хүндрэлтэй болсон. Нэг хүүхдийн хичээлийн хэрэгсэл бэлдэхэд 500 мянган төгрөг зарцуулж байна. 3 хүүхэдтэй айл 1.5 сая төгрөг зарцуулна гэсэн үг. Үүнийг зээл авч бэлдэж байна. Цалин, өрхийн орлого нь амьдралд нь хүрэхгүй зээл авч байна шүү дээ. Зээл гэдэг бол сонголт байх ёстой. Гэтэл Монгол Улсад зээл хэрэгцээ болчихлоо. Энэ нь төрийн бодлого буруу байгааг хэлж байна.
