Дэлхийн зах зээл дээр зэсийн үнэ түүхэн дээд түвшиндээ ойртож, тонн нь 14 мянган ам.доллар давлаа. Энэ өсөлтийн гол шалтгаан нь дэлхийн хэмжээнд зэсийн нийлүүлэлт огцом буурсантай холбохоос илүү АНУ-ын тарифын бодлого дэлхийн зэсийн худалдааны урсгалыг өөрчилж байна гэж шинжээчид дүгнэж байна.

Reuters агентлагийн мэдээлснээр Лондоны металлын биржийн гурван сарын хугацаатай зэсийн үнэ наймдугаар сарын 25-нд тонн нь 14,343 ам.долларт хүрчээ. Энэ нь тус биржийн түүхэн дээд үнэ болох 14,527.50 ам.долларт тун ойртсон үзүүлэлт юм.

АНУ 2027 оноос импортын зэсэнд тариф ногдуулж болзошгүй гэсэн хүлээлттэй холбоотойгоор худалдаачид металлыг урьдчилан Америкийн зах зээлд татаж байна. Үүний улмаас АНУ-ын агуулах дахь зэсийн нөөц эрс нэмэгдэж, бусад зах зээлд нийлүүлэлт харьцангуй хумигдах байдал ажиглагдаж буй.

Гэхдээ зэсийн эрэлтийг урт хугацаанд өсгөж буй өөр нэг том хүчин бол хиймэл оюун ухаан, цахилгаан автомашин болон эрчим хүчний шилжилт юм. Дата төв, цахилгаан сүлжээ, сэргээгдэх эрчим хүчний байгууламжид их хэмжээний зэс шаардлагатай бөгөөд энэ өсөн нэмэгдэж буй хэрэглээг дэлхийн нийлүүлэлт хангахад бэрхшээлтэй тулна. Одоо ажиллаж буй үйлдвэрлэл хэрэглээг бүрэн хангаж чадахгүй учраас ирээдүйд зэсийн олон уурхайг нээх ёстойг экспертүүд хэлдэг.