Ардчилсан нам өнөөдрөөс гурван сарын хугацаанд улс орон даяар “Өөрчилье Бүтээе” үндэсний хөдөлгөөн эхлүүлж байгаа аж. Гурван сар үргэлжлэх тус хөдөлгөөнөөр нэг сая иргэнтэй уулзаж, Монгол Улсыг өөрчлөх 100 санал, шийдлийг гаргана гэдгийг намын дарга О.Цогтгэрэл хэллээ.

Тэрээр “Энэ үндэсний хөдөлгөөн Монголоо өөрчилье, Монголоо бүтээе агуулгын хүрээнд гурван сар үргэлжилнэ. Монгол Улс өнөөдөр уул уурхайн бүтээгдэхүүний түүхий эдийг гадагшаа гаргадаг, түүнийгээ хувааж иддэг, хэрэлддэг ус болчихлоо. Үүн дээр нь эрх баригчид тоглодог, энэ мөнгийг тарааж сонгуулийн саналыг нь худалддаг улс оронд ирээдүй байхгүй. Иймээс улс орноо өөрчлөлтөд уриалж, бүтээдэг Монгол болгохын төлөө ажиллана.

Энэ бол зөвхөн уриа лоозон биш. 2025 онд манай улсад сүүлийн 20 жилийн хамгийн бага хүүхэд төрсөн. Яагаад залуучууд ирээдүйдээ ийм итгэлгүй байна вэ. Хүүхэд нярай байхад нь эмнэлгийн шалан дээр хэвтүүлж, цэцэрлэгт сугалаагаар орно, дунд сургуульд 3,4 ээлжээр хичээллэнэ, их сургуульд тэр айл ядуурлын эгнээнд орж, сургууль төгсөөд гадагшаа гарахад визэнд дугаарлана. Ийм учраас эцэг эхчүүд ирээдүйдээ итгэлгүй болж байна. Хөгшчүүд нь тэтгэвэртээ гараад ядуурлын эгнээнд орж байна. Энэ бүхнийг өөрчлөх цаг болсон. Өөрчлөлт нь зүг чигтэй байх ёстой.

Үүний хүрээнд гурван сарын хугацаанд нэг сая орчим иргэнтэй уулзаж, 100 мянган амьд харилцаа хийхийг зорьж байгаа. Ингээд бид монголыг өөрчлөх 100 саналыг гаргаж, 100 саналаа 100 шийдэл болгоно. Ардчилсан намын 2027 оны Ерөнхийлөгчийн сонгууль, 2028 оны УИХ-ын сонгуульд салбар бүрийн 100 шийдэлтэйгээр оролцоно” гэлээ.