Унгарын парламент мягмар гарагт Дээд шүүхийн Ерөнхийлөгчөөр ажиллаж байсан Андраш Бакаг тус улсын дараагийн Ерөнхийлөгчөөр сонголоо. Энэ нь Ерөнхий сайд Петер Мадьяр өмнөх Ерөнхий сайд Виктор Орбаны эрх мэдлийн тогтолцооны үлдэгдлийг задлах зорилтынхоо хүрээнд хийж буй бэлгэдлийн чанартай алхам боллоо.

Парламентын голчлон ёслолын чиг үүрэгтэй Ерөнхийлөгчийн албан тушаалд Бакаг эрх баригч төвийн баруун чиг баримжаатай Тиса намын гишүүдийн саналаар сонгосон байна. Харин сөрөг хүчний Фидес намын гишүүд санал хураалтад оролцоогүй аж.

Бака тангараг өргөснийхөө дараа хэлсэн үгэндээ өмнөх Засгийн газрыг шүүмжилж, Орбаны засаглалын үед “нэг нам төрийн эрхийг бүхэлд нь гартаа авсан”, эрх мэдлийн байгууллагуудын хуваарилалт алдагдаж, харилцан хяналт, тэнцвэрийн тогтолцоо ажиллахаа больсон гэж мэдэгджээ.

Гэхдээ Унгарын шинэ ирээдүйг цогцлоохын тулд “шударга ёс төдийгүй өөрийгөө хянах чадвар” шаардлагатай гэж тэрээр хэлсэн байна. Мөн Ерөнхийлөгчийн үүрэг нь үзэл бодол нь өөр өөр иргэдийг төлөөлөх явдал гэдгийг онцолжээ.