Хөлбөмбөгийн ертөнцөд тамирчдын өмсдөг шипи нь зөвхөн спортын хэрэгсэл бус, түүхэн мөч, дурсамжийг хадгалсан үнэт цуглуулга болж чаддаг. Тэдгээрээс хамгийн өндөр үнэд хүрсэн нь Аргентины хөлбөмбөгчин Лионель Мессигийн өмсөж байсан Adidas Nemeziz 1 шипи юм.

Мессигийн энэхүү шипи 2021 онд дуудлага худалдаагаар 125 мянган фунт стерлинг буюу ойролцоогоор 174 мянган ам.доллароор зарагдсан байна. Ингэснээр хөлбөмбөгийн тоглолтод өмсөгдсөн хамгийн үнэтэй шипи хэмээн бүртгэгдсэн юм. Энэхүү шипийг Месси Барселона клубийн төлөөх 644 дэх гоолоо оруулах үедээ өмссөн бөгөөд уг гоол нь нэг клубийн төлөө оруулсан гоолын тоогоор Бразилийн домогт тоглогч Пелегийн амжилтыг давсан түүхэн үйл явдал болсон билээ.

Месси уг шипи дээрээ гарын үсгээ зурж, эмнэлгийн сайн үйлсийн зорилгоор дуудлага худалдаанд оруулсан бөгөөд олсон орлогыг хүүхдийн эрүүл мэндийн төсөлд зориулжээ.

Харин цуглуулагчдын дунд өндөр үнэлэгддэг өөр нэг загвар бол Португалийн од Криштиану Роналдугийн нэртэй Nike Mercurial Superfly CR7 “Chapter 6” шипи юм. Хязгаарлагдмал тоогоор үйлдвэрлэгдсэн энэ загвар нь CR7 цувралын хамгийн эрэлттэй загварын нэг юм.