Засгийн газрын хуралдаанаар эм, эмнэлгийн хэрэгслийг нэг эх үүсвэрээс худалдан авах журмыг баталлаа. Энэхүү шийдвэрийн талаар Эрүүл мэндийн сайд Э.Батшугар мэдээлэл өглөө.
Тэрээр "Эрүүл мэндийн яамнаас иргэдийн өргөн хэрэглээний болон тасалдах эрсдэлтэй зарим төрлийн эмийг нэг эх үүсвэрээс, чанарын өндөр стандарттай үйлдвэрлэгчээс хямд үнээр, төвлөрсөн байдлаар худалдан авах шинэ журмыг баталлаа.
Хэд хэд бүлэг эмүүдийг нэг эх үүсвэрээр худалдан авна. Нэмэлт, шаардлагатай эмнэлэгийн бүтээгдэхүүн болон өндөр үнэтэй эм, өдөр тутам хэрэглэдэг эмнүүд, тасалдах эрсдэлтэй эм зэргээр нэг эх үүсвэрийн худалдан авалт хийнэ.
ЮНИСЕФ болон олон улсын байгууллагаар дамжуулан эрүүл мэндийн байгууллагуудын тусламж үйлчилгээнд түгээмэл хэрэглэдэг даралтны эм, антибиотик болон зардал өндөр, нэн шаардлагатай, тасалдал үүсэх өндөр эрсдэлтэй эмийг чанартай, боломжийн үнээр нэгдсэн худалдан авалтаар шууд нийлүүлэх боломжтой.
Мөн тасалдал үүсэх эсдэлд ороод байсан гемофилийн эсрэг эмийг уг санамж бичгийн хүрээнд худалдан авах юм. Гемофилийн эсрэг эмийг цус бүлэгнэлтийн эмгэгтэй өвчтөнд тогтмол тарьж, цус алдалтаас сэргийлэх, цус алдалтыг эмчлэхэд хэрэглэдэг. Мөн уналт таталтын эсрэг эмүүдийг ч нэгдсэн худалдан авалтаар нийлүүлэх эмийн жагсаалтад оруулж байна. Гемофилийн эсрэг эм манай улсад өндөр өртөгтэй байдаг. Үүнийг бид АНУ-ын компаниас худалдан авахдаа 350 сая орчим төгрөг хэмнэж, худалдан авсан. Нэгдсэн худалдан авалт хийснээр бид асар өндөр өртгийг хэмнэх боломжтой. Нэг эх үүсвэрийн худалдан авалттай болсноор улсын төсвийг хэмнэхээс гадна өндөр чанартай, ДЭМБ-ын хатуу зохицуулалттай улс орнуудаас худалдаж авна гэсэн үг.
