Өмнөд Солонгосын Black Combat холбооны зохион байгуулж буй “Black Cup” тэмцээний хагас шигшээ шатанд Монголын баг БНСУ-ын Omega багийг 4:3-аар буулган авч, аваргын төлөө өрсөлдөх эрхээ авсан. Харин хагас шигшээ шатны сүүлийн тулаанд АНУ, Японы багууд наймдугаар сарын 29-нд тулалдаж, ялсан нь Монголын багтай 200 сая воны шагналын төлөө финалд өрсөлдөнө.

Энэхүү холимог тулааны тэмцээнд Монголын багийн -84 килограммын жинд өрсөлдөж буй жюү жицүгийн Үндэсний шигшээ багийн тамирчин Г.Гантулгатай ярилцлаа.

-Хэзээнээс спортоор хичээллэж эхэлсэн бэ. Жюү жицү, холимог тулааны бэлтгэлээ яаж зохицуулж байгаа вэ?

-Би Ховд аймгийн Дарви суманд төрж, өссөн. Хотод шилжин ирээд 49 дүгээр сургуульд суралцаж байх үед биеийн тамирын багш маань “спортоор хичээллэх хүүхэд байна” гэж зөвлөснөөр жүдо бөхөөр хичээллэж эхэлсэн. Багадаа зодог, шуудаг өмсөөд гүйдэг хүүхэд байлаа. Подволк өмсөхөд хүртэл толгой багтдаггүй болохоор энгэрийг нь задлаад өмсдөг байсан. Хамаатнууд маань “толгойгоо дагаад том биетэй хүн болно” гэдэг байсан.