Европын Холбоо (ЕХ) ОХУ-ын эсрэг хэрэгжүүлж буй 21 дэх багц арга хэмжээний хүрээнд Монгол Улсын Чингис Хаан банкийг хоригийн жагсаалтад оруулсан байна. Тодруулбал, 2026 оны долдугаар сарын 23-нд Европын Холбооны Зөвлөл ОХУ-ын эсрэг хэрэгжүүлж буй 21 дэх багц хоригийг албан ёсоор баталж, хүчин төгөлдөр болгосон бөгөөд хоригт гурван улсын дөрвөн банкийг нэмжээ.

Reuters агентлагийн мэдээлснээр, энэ удаагийн хориг нь Оросын банкны салбар, криптовалютын сүлжээ болон газрын тосны худалдаанд чиглэсэн өргөн хүрээтэй арга хэмжээний нэг хэсэг бөгөөд Монгол, Киргиз, Энэтхэг зэрэг гуравдагч орны нийт дөрвөн банкинд хориг үйлчлэхээр болсон байна.

Европын Холбоо эдгээр банкуудыг "ЕХ-ны хоригийг тойрон гарахад ОХУ-д дэмжлэг үзүүлсэн, эсвэл Оросын санхүүгийн системтэй холбоотой үйлчилгээ үзүүлсэн" гэж үзжээ. Энэ нь тухайн банкуудыг Оросын дайныг шууд санхүүжүүлсэн гэсэн утга биш хэдий ч хоригт орсон байгууллагуудтай төлбөр тооцоо хийх, санхүүгийн зуучлал үзүүлэх зэрэг үйл ажиллагаа явуулсан гэж үзэж байгаа аж.

Харин Монголбанк долдугаар сарын 24-нд гаргасан мэдэгдэлдээ, ЕХ-ны хориг нь зөвхөн Чингис Хаан банкинд хамаарах бөгөөд Монголын банкны системд бүхэлд нь хамаарахгүй гэж мэдэгдсэн. Тус банк нь Монголын банкны салбарын нийт активын маш бага (0,02) хувийг эзэлдэг тул санхүүгийн тогтвортой байдалд системийн эрсдэл үүсгэхгүй гэж үзэж байгаагаа онцолсон байна.