Ховд аймгийн Жаргалант суманд энэ сарын 20-ны өдөр бүртгэгдсэн тарваган тахлын сэжигтэй тохиолдлын баталгаажуулах шинжилгээний хариу эерэг гарч, тарваган тахлын хүний өвчлөл болох нь батлагдлаа.

Аймгийн Зоонозын өвчин судлалын төвөөс хийсэн урьдчилсан тандалтаар тухайн иргэн Баян-Өлгий аймгийн Улаанхус сумаас тарвага агнаж, хүнсэндээ хэрэглэх явцдаа халдвар авсан байх магадлалтай байна. Мэргэжлийн байгууллагаас батлагдсан тохиолдолын нэгдүгээр хавьтлын 12 иргэнд PCR шинжилгээ хийхэд сөрөг гарчээ.

Тарваган тахлын идэвхтэй үе нь жил бүрийн 7-10 сар хүртэл үргэлжилдэг бөгөөд өндөр эрсдэлтэй үе нь найм болон есдүгээр сар юм. Иймээс ид идэвхтэй үе эхэлж байгаа энэ үед иргэд та бүхнийг тарвага агнах, барих, тарваганы мах, эд эрхтэнтэй харьцахгүй байх, үхсэн болон өвчилсөн мэрэгч амьтанд хүрэхгүй байхыг анхааруулж байна.

Тарваган тахал өвчнөөс урьдчилан сэргийлэхийн тулд:

• Тарвага агнахгүй байх
• Тарваганы мах идэхгүй байх
• Түүхий эд, эрхтэнг хэрэглэхгүй байх
• Тарвагыг нохойгоор бариулахгүй байх, урхи, хавхаар агнахгүй байх
• Тарваганы түүхий мах эд, эрхтэнг хот суурин газарт оруулахгүй байх
• Хүүхдийг тарваганы дошон дээр тоглуулахгүй, унтуулахгүй байх
• Шимэгчид хазуулахаас сэргийлж дайжуулагч хэрэглэх
• Тарваган тахлын эсрэг вакцин тариулах
• Гэр орондоо агнасан тарвага, арьс хадгалахгүй байх
• Гэр орондоо мэрэгч амьтан орохоос сэргийлж тор хийх, май тавих,
• Үхсэн, хөдөлгөөн удааширсан тарваганд хүрэхгүй байх
• Үхсэн тарвага, мэрэгч амьтдын тухай холбогдох байгууллагад нэн яаралтай мэдэгдэх.
• Тарваган тахлын эрсдэлд өртсөн, эмнэлзүйн шинж тэмдэг илэрсэн тохиолдолд харьяа эрүүл мэндийн байгууллагад яаралтай мэдээлж дуудлага өгөх хэрэгтэй.