Монголын Засгийн газар Оюу толгойн гэрээг хийснээс хойш 17 жилийн дараа анх удаа зээлийн хүүгээ бууруулж, ногдол ашиг авах хугацааг 11 жилээр урагшлуулж энэ жилээс ногдол ашиг авах хэлэлцээрт хүрч чадлаа.
Өнгөрсөн оны аравдугаар сарын 30-аас эхэлсэн хоёр талын хэлэлцээрийн сүүлийн өдөр өчигдөр байсан бөгөөд талууд хэлэлцээрт хүрч, төслөө цааш үргэлжүүлэхээр болов.
Оюу толгой төслийн менежментийн зардлыг 2.2 тэрбум ам.доллар буюу 8 орчим их наяд төгрөгөөр бууруулж, Монголын талын өгөөжийг 1.5 тэрбум ам.доллар буюу 5 орчим их наяд төгрөгөөр нэмэгдүүлсэн. Хувь нийлүүлэгчдийн зээлийн хүү 10.5 хувь байсныг 7.9 хувь болгон бууруулна.
Зээлийн хүүг бууруулснаар Оюу толгойн баялгаас өр зээлд төлөх байсан 6.2 тэрбум ам.доллар буюу 22 их наяд төгрөгийг хэмнэх боломж бүрджээ. Ингэснээр Монголын талын хүртэх өгөөж 2.5 тэрбум ам.доллар буюу 8 орчим их наяд төгрөгөөр нэмэгдэх боломжтой.
Оюу толгойн хувь нийлүүлэгчийн зээлийн хүүг 7 жил тутам бууруулах цонх нээгддэг байсныг 3 жил тутамд эргэж харж, хэлэлцэнэ.
Монгол Улсын Засгийн газар Оюу толгой төслөөс хүртэх ногдол ашгаа энэ оноос авна.
Энэ бүх хэлэлцээр төсөл эхэлснээс хойших анхны том бөгөөд амжилттай хэлэлцээр болж чадсан. Гэхдээ аливаа хэлэлцээр, хамтын ажиллагаа хоёр талд харилцан ашигтай байх ёстой. Хөрөнгө оруулагч Рио Тинто групп өөрт ашиггүй хэлэлцээрийг зөвшөөрөхгүй. Тиймээс Монгол Улсын Засгийн газар энэ бүх хэлэлцээрийн цаана мөн л хариуцлага хүлээх учиртай. Гэхдээ өчигдөр Ерөнхий сайд Н.Учралын мэдэгдлийн үеэр манай талын хүлээх, үүрэг хариуцлагыг дурдаагүй. Тэгвэл зарим эх сурвалжийн мэдээлж буйгаар Онтрэ компанийн эзэмшиж буй хоёр лицензийг Рио Тинто группт шилжүүлэх, зэсийн АМНАТ-ийг буулгах буюу 5 хувиар тооцох гэх мэт үүргийг Монголын Засгийн газар хүлээхээр болсон гэжээ.
Оюу толгойн хамгийн чухал, ирээдүйд ашиглалтад орох алт, зэс, молибденийн Жавхлант, Шивээ толгой хоёр лиценз дээр Монголын төр 34 хувийн эзэмшлээ хэрхэн шийдвэх вэ гэдэг асуудал бий. Рио Тинто талаас Онтрэийн эзэмшиж буй хоёр лиценз дээр шинэ Хөрөнгө оруулалтын гэрээ хийх шаардлагагүй гэсэн байр суурьтай байдаг. Учир нь шинээр Хөрөнгө оруулалтын гэрээ хийвэл зэсийн АМНАТ-ийг одоогийн хуулиар буюу 22 хувиар төлнө. Харин Оюу толгойн хөрөнгө оруулалтын гэрээний дагуу 5 хувиар л АМНАТ төлдөг. Тиймээс дээрх хоёр лицензийг Оюу толгой руу шилжүүлж АМНАТ-ийг 5 хувиар тогтоохыг манай тал зөвшөөрсөн гэсэн мэдээлэл байгаа юм. Гэхдээ өчигдрийн хэлэлцээрээр Онтрэгийн асуудлыг шийдээгүй, харин Онтрэтэй хийх хэлэлцээр эхэлж байна гэдгийг Ерөнхий сайд Н.Учрал хэлсэн. Ямартаа ч хоёр тал харилцан ашигтай байж, хэлэлцээр үр дүнд, амжилтад хүрнэ. Тиймээс Рио Тинто групп Монголын талд ямар шаардлага тавьсан нь удахгүй тодорхой болох биз ээ.
