Дэлхийн дулаарал эрчимжиж, олон бүс нутагт агаарын температур түүхэн дээд хэмжээнд хүрч буй энэ үед эрдэмтэд болон инженерүүд хэт халалтын нөлөөг бууруулах шинэ шийдлүүдийг туршиж байна. Эдгээр судалгааны зорилго нь хүмүүсийг халуунаас хамгаалах, эрчим хүчний хэрэглээг бууруулах, хот суурин газрын температурыг багасгах шинэ шийдлүүдийг бий болгоход чиглэж байна. 

АНУ-ын алдарт Massachusetts Institute of Technology-ийн судлаачид хүний биеийг шууд хөргөх боломжтой зөөврийн төхөөрөмж бүтээж байна. Тус төхөөрөмж нь энгийн агааржуулагчтай харьцуулахад хэд дахин бага цахилгаан зарцуулдаг бөгөөд халуун бүс нутагт ажиллаж амьдардаг хүмүүст зориулсан шийдэл болох аж. 

Мөн судлаачид газрын гүний температурыг ашиглан барилга байгууламжийг хөргөх систем, байгаль орчинд сөрөг нөлөө багатай шинэ төрлийн хөргөлтийн технологиудыг туршиж байгаа юм. Эдгээр нь өнөөдөр өргөн хэрэглэгддэг, хүлэмжийн хийн ялгаралд нөлөөлдөг хөргөгч бодисуудыг орлох зорилготой байна. 

Дэлхийн олон хот халууны эсрэг өөр өөр шийдэл нэвтрүүлж эхэлжээ. Тухайлбал, нарны гэрлийг ойлгодог цагаан дээвэр ашиглах, хотын ногоон байгууламжийг нэмэгдүүлэх, сэрүүн бүс буюу “cooling center” байгуулах зэрэг арга хэмжээнүүд үр дүнгээ өгч байна. Судлаачдын үзэж буйгаар мод тарих, сүүдэртэй орчин бий болгох нь хотын температурыг мэдэгдэхүйц бууруулах боломжтой аж. 

НҮБ болон олон улсын байгууллагууд хэт халалтыг XXI зууны хамгийн том эрүүл мэндийн эрсдлүүдийн нэг гэж үзэж байна. Жил бүр дэлхий даяар хэдэн зуун мянган хүн халууны улмаас амь насаа алдаж байгаа бөгөөд уур амьсгалын өөрчлөлт үргэлжилбэл энэ тоо цаашид өсөх төлөвтэй байгаа юм. 

Ирээдүйд зөвхөн агааржуулагч ашиглахаас гадна барилга байгууламж, хот төлөвлөлт, хувийн хамгаалалтын технологийг шинэ түвшинд гаргах шаардлага тулгарч байна. Хэт халалтын эсрэг туршигдаж буй эдгээр төслүүд нь ирээдүйн хотуудыг илүү аюулгүй, амьдрахад таатай болгох чухал алхам гэж үнэлэгдэж байна.