Хойд Солонгосын эмэгтэй хөлбөмбөгийн Naegohyang FC баг Азийн эмэгтэйчүүдийн Аваргуудын лигийн хагас шигшээ тоглолтод оролцохоор ням гарагт Өмнөд Солонгост хүрэлцэн ирлээ. Энэ нь Хойд Солонгосын тамирчид Өмнөд Солонгост ирсэн найман жилийн дараах анхны тохиолдол болж байна.

Тус багийн 27 тоглогч, 12 ажилтан Бээжингээс иржээ. Тэд өнгөрсөн Мягмар гарагаас эхлэн Бээжинд бэлтгэл хийж байсан бөгөөд лхагва гарагт Сувон хотод болох Suwon FC Women багтай хийх тоглолтын өмнө тус улсад нэвтэрсэн нь энэ юм. Сөүлийн Нэгдлийн яамны мэдээлснээр энэхүү айлчлалыг Солонгос хоорондын солилцооны тухай хуулийн хүрээнд зөвшөөрсөн бөгөөд багийнхныг ирэх амралтын өдрүүд хүртэл оршин суух эрхээр хангажээ. Гэхдээ тэмцээнээс хасагдвал тэд илүү эрт буцах боломжтой аж.

Өмнөд Солонгосын хэвлэлүүдийн мэдээлснээр олон нийтийн сонирхол өндөр байгаа бөгөөд Өмнөд Солонгосын хөлбөмбөгийн холбооны худалдаанд гаргасан 7087 тасалбар нэг хоногийн дотор бүрэн зарагдсан байна.

Энэ удаагийн ховор айлчлал нь Хойд Солонгос сүүлийн жилүүдэд Өмнөд Солонгосыг “хамгийн дайсагнасан улс” хэмээн нэрлэж, 1950-1953 оны Солонгосын дайнаар хуваагдсан үндэстнийг дахин нэгтгэх боломжгүй гэж мэдэгдсээр ирсэнтэй давхцаж байна.

Харин Өмнөд Солонгосын Ерөнхийлөгч И Жэ Мён хоёр Солонгосын харилцааг сайжруулахыг уриалж байгаа юм.

Нэгдлийн яам хоёр Солонгосын харилцан ойлголцлыг нэмэгдүүлэх боломжтой гэж үзэн, хоёр багийг дэмжих хөгжөөн дэмжигчдийн ажиллагаанд зориулж Солонгос хоорондын хамтын ажиллагааны сангаас 300 сая вон буюу 200 мянган ам.доллар төсөвлөжээ. Гэхдээ энэ нь үндэсний шигшээ багуудын бус клубүүдийн тоглолт учир Азийн Хөлбөмбөгийн Холбооны дүрмийн дагуу төрийн дуулал эгшиглэхгүй бөгөөд улс төрийн бэлгэдэл, тэр дундаа Солонгосын нэгдлийн тугийг ашиглахгүй юм.