АНУ-ын ерөнхийлөгч Дональд Трамп, БНХАУ-ын дарга Ши Жиньпин нар төрийн айлчлалын хоёр дахь өдрийн уулзалтаа баасан гарагт үргэлжлүүлэхээр болжээ. Тансаг ёслол, бизнесийн хэлэлцээрүүдээр өрнөсөн энэхүү айлчлалын үеэр Ши Жиньпин Тайванийн асуудлыг хэт дэвэргэвэл АНУ-Хятадын харилцаа “маш аюултай нөхцөл байдалд” хүрч болзошгүйг хатуу анхааруулсан юм.

Трамп 2017 онд анхны бүрэн эрхийн хугацаандаа БНХАУ-д айлчилснаас хойш АНУ-ын ерөнхийлөгчийн хувиар тус улсад айлчилж буй анхны тохиолдол болж байна. АНУ-ын стратеги болон эдийн засгийн гол өрсөлдөгч болох Хятадад хийж буй энэ айлчлалаас тэрбээр завсрын сонгуулийн өмнө буурсан нэр хүндээ сэргээх бодит үр дүн хүлээж байгаа аж.

“Хятадтай харилцах харилцаа маань урьд өмнөхөөсөө илүү хүчтэй, илүү сайн болно гэж найдаж байна” хэмээн Трамп баасан гарагийн өглөө өөрийн Truth Social платформд бичжээ.

Энэ удаагийн дээд хэмжээний уулзалтын гол зорилго нь өнгөрсөн аравдугаар сард байгуулсан худалдааны түр эвлэрлийг хадгалах явдал байв. Тухайн үед Трамп Хятадын бараанд ногдуулсан гурван оронтой тарифуудаа түдгэлзүүлж, харин Ши Жиньпин дэлхий дахины газрын ховор элементийн нийлүүлэлтийг хязгаарлах алхмаасаа ухарсан юм.