Нэмэгдсэн өртгийн албан татварын тухай хуульд өнгөрсөн оны арваннэгдүгээр сарын 14-нд өөрчлөлт оруулж буцаан олголтыг 5 хувь байхаар хуульчилсан. Тус хууль энэ оны аравдугаар сарын 1-ээс хэрэгжих бөгөөд иргэд НӨАТ-ынхаа 5 хувийг буцаан авдаг болно гэсэн үг.

Тэгвэл Засгийн газар "Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулий төсөл"-ийг өргөн мэдүүлэхдээ дагалдуулан НӨАТ-ын тухай хуульд нэмэлт, өөрчлөлт оруулах хуулийн төслийг өргөн барьжээ. Ингэхдээ 5 хувийг нь буцаан олгох хуулийг хүчингүй болгож, одоогийнх шиг хоёр хувийг олгодог байхаар оруулж ирсэн байна. Учир нь НӨАТ-ын 5 хувийг буцаан олгож эхэлвэл 2027 оны төсөвт 1.6 их наядын эх үүсвэр шаардлагатай болох бөгөөд энэ эх үүсвэрийг олох хүндрэлтэй байгаа учраас ийнхүү хүчингүй болгох хуулийг оруулж иржээ. Хэрвээ УИХ дээрх хуулийг дэмжин баталвал иргэд энэ оны сүүлийн улиралд НӨАТ-ынхаа 5 хувийг буцаан авч, 2027 оноос дахин 2 хувиа авдаг болох юм.

Түүнчлэн Олон улсын валютын сангийн Монгол Улсад хийсэн 2025 оны зөвлөлдөх хэлэлцүүлгээр НӨАТ-ын урамшууллын буцаан олголтыг огцом нэмэгдүүлэх, татварын хувь хэмжээ, суурийг бууруулах арга хэмжээг хэрэгжүүлэх нь татварын орлогыг бууруулж, төсвийн алдагдлыг нэмэгдүүлэхийн зэрэгцээ зайлшгүй шаардлагатай хөгжлийн төслүүдийг хэрэгжүүлэх төсвийн боломжийг хумих эрсдэлтэй гэж дүгнэжээ.

Энэ 7 хоногийн байнгын хороо болон нэгдсэн чуулганаар дээрх хуулиудыг хэлэлцэж эхлээд байгаа бөгөөд УИХ эцэслэн батална.

Уг нь НӨАТ-ын буцаалтыг 5 хувь болгохыг 100 гаруй мянган иргэн дэмжиж, хуульд нэмэлт өөрчлөлт оруулсан. 2024 оны байдлаар НӨАТ нь нийт татварын 24 хувийг бүрдүүлж байгаа. Уг нь НӨАТ-ын хувь хэмжээг багасгавал татвар төлөгчдийн бааз суурь нэмэгдэнэ гэдгийг эдийн засагчид ч, зарим улстөрчид ч хэлдэг. Тэгвэл Засгийн газар буцаалтыг 5 хувь болгох хуулийг хүчингүй болгохоор болжээ.