Шүүх шинжилгээний байгууллагын нөхцөл байдал ялангуяа хөдөө орон нутагт маш хүндрэлтэй байгаа талаар ХЭҮК-ын гишүүн Б.Энхболд мэдээлэл өглөө.

Тэрээр “Монгол Улсад жил бүр шүүхээр шийдвэрлэгдэж байгаа хэрэг, маргааны 98 хувьд нь шүүх шинжилгээний байгууллагын дүгнэлт гарч, тэр нь тухайн хэргийг шийдвэрлэх гол нотлох баримт нь болж хэрэглэгддэг. Өөрөөр хэлбэл, шүүхийн шийдвэрт өндөр ач холбогдолтой баримт бүрдүүлдэг байгууллага юм. Шүүх шинжилгээний байгууллага жилд дунджаар 35 мянга орчим хэргийн газрын үзлэг хийж, 75 мянга орчим шинжилгээ гүйцэтгэдэг бөгөөд өдөрт 200 гаруй шинжилгээ хийдэг байна.

Хүний эрхийн Үндэсний Комисс Шүүх шинжилгээний ерөнхий газрын нийслэлийн зургаан дүүрэг, 21 аймаг, дөрвөн сум, улсын хэмжээнд үйл ажиллагаа явуулж байгаа нийт 33 нэгжид хяналт, шалгалт хийсэн. Мөн одоогийн нөхцөл байдал ямар байгаа талаар салбарын 1000 гаруй ажилтан, алба хаагчтай ярилцлага хийж, дүгнэлт гаргасан.

Гол дүгнэлтээс харахад орон нутаг, ялангуяа аймгийн төвүүд болон зарим сумдад үйл ажиллагаа явуулж байгаа шүүх шинжилгээний байгууллагуудын орчин нөхцөл, барилга байгууламж, лабораторийн стандарт нь хүний эрх зөрчих эрсдэлтэй нөхцөл байдал үүсгэсэн гэж үзжээ. Тодруулбал, шүүх шинжилгээний байгууллага хараат бус, бие даасан байх ёстой байтал өөрийн гэсэн байргүй, эсвэл ашиглалтын хугацаа нь дууссан, ашиглахыг хориглосон барилгад үйл ажиллагаа явуулж байгаа тохиолдол цөөнгүй байна.