3х3 сагсан бөмбөгийн дэлхийн хамгийн нэр хүндтэй цуврал болох “FIBA 3x3 World Tour” энэ оны улирлаа эхлүүлэхэд бэлэн болж, дэлхийн шилдэг багуудын өрсөлдөөн дахин эхлэх гэж байна. FIBA-аас зохион байгуулдаг уг тэмцээн нь олон хотод шат дараатайгаар явагддаг бөгөөд улирлын турш оноо цуглуулсан багууд финалд шалгардаг онцлогтой.

Энэ удаагийн цувралын нэгэн чухал шат болох “FIBA 3x3 World Tour Shanghai”  тэмцээн тавдугаар сарын 23-24-нд Шанхай хотод зохион байгуулагдах юм. Тус тэмцээнд дэлхийн шилдэг клуб багууд оролцож, аваргын төлөө өрсөлдөнө.

Тэгвэл Монголын сагсан бөмбөгийн холбооноос зохион байгуулсан “The League Quest 1” тэмцээн өндөрлөж, шилдэг багууд шигшигдэн 3х3 Шанхайн дэлхийн цуврал тэмцээнд оролцох багууд албан ёсоор тодорлоо.

Эрэгтэйчүүдийн ангилалд “Ulaanbaatar East” болон “Ulaanbaatar West” багууд финалд үлдэж, ширүүхэн өрсөлдөөнийг үзүүлсэн. Шийдвэрлэх тоглолтод “Ulaanbaatar East” баг илүү довтолгоо, хамгаалалтыг хослуулж 22:15-ын харьцаагаар ялалт байгуулснаар FIBA 3x3 World Tour Shanghai тэмцээнд Монгол Улсыг төлөөлөх эрхийг авлаа.

Эмэгтэйчүүдийн төрөлд “Mongolia” баг хүчтэй тоглолтыг үзүүлж, финалд “Bayangol Amazons”-ыг 21:5 гэсэн илт давуу оноогоор буулган авсан нь тэдний форм, бэлтгэл ямар өндөр байгааг харуулсан юм. Ийнхүү эмэгтэй баг ч мөн Шанхайг зорих эрхээ баталгаажууллаа.

Монголын багууд сүүлийн жилүүдэд 3х3 төрлөөр эрчимтэй хөгжиж, олон улсын тавцанд тогтмол амжилт гаргаж байгаа. Ирэх улиралд өрсөлдөөн улам ширүүсэх төлөвтэй байгаа бөгөөд Монголын багуудын амжилт олон улсын анхаарлыг дахин татах эсэх нь спорт сонирхогчдын гол хүлээлт болоод байна.