Ерөнхий сайд Н.Учрал эрүүл мэнд, боловсролын салбарын эмч, багш, ажилтнуудын цалинг тавдугаар сарын 1-ээс нэмэх үүргийг салбарын сайдуудад өгсөн. Мөн эрчим хүчний салбарын ажилтнууд цалингаа 30-аас дээш хувиар нэмэгдүүлэхийг шаардаж өчигдрөөс Төв талбайд жагсаж эхэлсэн. Уг асуудлын талаар Сангийн сайд З.Мэндсайхан сэтгүүлчдэд мэдээлэл өглөө.

Тэрээр “2026 оны төсөвт эрүүл мэнд, боловсролын салбарын ажилтнуудын цалинг нэмэгдүүлэхэд зориулж 680 орчим тэрбум төгрөг суулгасан. Тухайн үед асуудал хариуцаж байсан сайд нар хариуцлагагүй хандаж, бүгд хоёр цалинтай болчихсон байна. Эхнээсээ шийдвэрлэж байна. Одоогоор эрчим хүчний салбарынхны цалинг нэмэх төсөв байхгүй. Боловсролын сайд байсан П.Наранбаяр эмч нарын үндсэн цалинг нэмэгдүүлээд, авах ёстой нэмэгдлийг хуучин цалингаас нь бодоод замбараагүй, төсвийн сахилга батгүй зүйл хийсэн байна. П.Наранбаярын гаргасан алдааг татвар төлөгчдийн мөнгөөр засах гэж байна.

Энэ 7 хоногийн Засгийн газрын хуралдаанаар эрүүл мэндийн салбарын цалингийн асуудлыг шийдвэрлэхээр болсон. Гэхдээ бид нар тухайн сайдын багцад суусан төсвийн хүрээнд нь зохицуулалт хийж, шийдэх болно.

Төсвийн хүрээний мэдэгдлийг тавдугаар сарын 31-ний дотор батлах ёстой. Үүнээс гурван сарын дараа төсвийн тодотгол хийж болно гэсэн хуулийн заалттай. Тэгэхээр өнөөдрийн үйлчилж байгаа хууль болон Төсвийн тухай хуулиараа тодотгол хийх үндсэн шаардлагууд үүсээгүй байна. Эдийн засаг хөгжлийн яамнаас эхлээд төсвийн мэдэгдлийг УИХ-аар батална. Энэ дээр тулгуурлаж төсвийг батална. Долдугаар сард төсвөө боловсруулж, намар хуулийн төслөө өргөн барина.

Б.Чойжилсүрэн сайд 4 их наяд ам.долларын хөрөнгө оруулалт татаж, эх үүсвэрүүдийг бий болгосон. Эрчим хүчний салбарын гол зүйл бол үнэ, өртгийн асуудал байгаа. Шинэ сайдууд 2026 оны батлагдсан төсөв дээр ажлаа аваад явж байгаа. Би бол байгаа төсвийнхөө хүрээнд  хэрхэн төсвийн ерөнхийлөн захирагч нарын багцын хүрээнд шийдэж болох зохицуулалтыг салбар салбарын яамтай хамтарч ажиллаж асуудлыг шийднэ. Эрүүл мэндийн яам, Сангийн яам хамтарч, ажлын хэсэг гаргаж Эрүүл мэндийн сайд Э.Батшугар үүсээд байсан асуудлыг шийдсэн. Одоо Боловсролын яамны Л.Энх-Амгалан сайдтай хамтарч, ажлын хэсэг гаргаж ажиллана” гэлээ.